နန်းတွင်းစစ်​ကြော​ရေးမှာ ပျောက်ကွယ်သွားတဲ့ လူငယ်​တွေအတွက်တာဝန်ခံရမယ့်သူ

မင်းခန့်/People’s Spring

အာရက္ခတပ်​တော် (AA)က ဖမ်းဆီးထားတဲ့ ဗိုလ်မှူးချူပ်သူရိန်ထွန်းဟာ မန္တ​လေးမြို့ အလယ်ပိုင်းတိုင်းစစ်ဌာနချုပ်မှာ တိုင်းဦးစီးချုပ်အဖြစ်တာဝန်ယူခဲ့တဲ့ကာလအတွင်းမှာ ဆန္ဒပြလူငယ်​တွေကိုဖမ်းဆီးနှိပ်စက်သတ်ဖြတ်မှု ​အများအပြားပြုလုပ်ခဲ့တာ​တွေအတွက် အဓိကတာဝန်ရှိသူတစ်ဦးဖြစ်တယ်လို့ ​တော်လှန်​ရေးအင်အားစု​တွေက ​ပြောကြပါတယ် ။

အသက် ၅၅ နှစ်ခန့်အရွယ်ဗိုလ်မှူးချုပ်သူရိန်ထွန်းဟာ စစ်တပ်အာဏာသိမ်းပြီး ပြည်သူ​တွေကို ရက်ရက်စက်စက်ဖိနှိပ်အကြမ်းဖက်ခဲ့တဲ့ ၂၀၂၁ ခုနှစ်ကနေ ၂၀၂၂ ခုနှစ်၊နှစ်ကုန်ပိုင်းအထိ မန္တလေးမြို့၊အလယ်ပိုင်းတိုင်းစစ်ဌာနချုပ်မှာ တိုင်းဦးစီးချုပ်အဖြစ်တာဝန်ယူခဲ့သူပါ ။

သူတိုင်းစစ်ဦးစီးချုပ်အဖြစ်တာဝန်ယူထားချိန်မှာလပခ စစ်တိုင်းမှူး ဗိုလ်ချုပ်ကိုကိုဦး နဲ့အတူ ငြိမ်းချမ်းစွာဆန္ဒပြ​နေတဲ့ပြည်သူ​တွေကို အကြမ်းဖက်သတ်ဖြတ်ဖြိုခွင်းဖို့ ၊ဖမ်းဆီးခံရတဲ့သပိတ်​ခေါင်း​ဆောင်း​တွေကို နန်းတွင်းစစ်​ကြော​ရေးမှာသတ်ဖြတ်ဖို့ အဓိကအမိန့်​ပေးခဲ့သူ​တွေဖြစ်ပါတယ်။ ဗိုလ်ချုပ် ကိုကိုဦးက​တော့ အခုအခါ ဒုတိယဗိုလ်ချုပ်ရာထူးနဲ့ ကစထမှူးတာဝန်ထမ်း​ဆောင်​နေတယ်လို့ CDM ဗိုလ်ကြီးဇင်​ယော်က​ပြောပါတယ် ။

မပခ မှာ ဒုတိယ အာဏာအရှိဆုံးသူအဖြစ် ၊တိုင်းဦးစီးချုပ်တာဝန်ယူခဲ့တဲ့အချိန်ဟာမန္တလေးမြို့မှာ ဆန္ဒပြလူငယ်တွေကို ဖမ်းဆီးနှိပ်စက်သတ်ဖြတ်မှု​တွေ ရက်ရက်စက်စက်ပြုလုပ်ခဲ့တဲ့ကာလတွေဖြစ်ပါတယ်။

စစ်ကိုင်းပညာရေးတက္ကသိုလ်ရဲ့ ဥက္ကဌမအေးနန္ဒာစိုးကို ၂၀၂၁၊စက်တင်ဘာ၁၉ရက်​နေ့ နေ့လယ်ပိုင်းမှာစစ်​ကောင်စီတပ်ကဖမ်းဆီးခဲ့ပါတယ်။အသက်၂၃နှစ်အရွယ် မအေးနန္ဒာစိုးဟာ နန်းတွင်းစစ်ကြောရေးမှာ၂၀၂၁ခုနှစ်ဒီဇင်ဘာလအထိရှိခဲ့ပြီး စစ်တပ်ကမအေးနန္ဒာစိုးကို အမျိုးမျိုးစစ်ဆေးခဲ့တယ်လို့ တခန်းတည်းအတူနေထိုင်ခဲ့သူတွေဆီကနေသိရပါတယ်။

“အရမ်းစိတ်မာတယ်။သူ့ကိုကြည့်လိုက်ရင် အမြဲတမ်းအေးဆေးပဲ။စစ်ကြောရေးကိုနောက်မှရောက်လာတဲ့သူတွေကိုလည်းကူညီပေးတယ်”လို့၂၀၂၁ခုနှစ် နိုဝင်ဘာလမှာ မအေးနန္ဒာစိုးနဲ့တခန်းထဲအတူနေခဲ့ဖူးသူကပြောပါတယ်။ ၂၀၂၂ခုနှစ်ဇန်နဝါရီလမှာ​တော့ မအေးနန္ဒာစိုးနဲ့အတူ တခြားလူငယ်အမျိုးသား၄ ဦးကို ညဘက်မှာ စစ်တပ်ကလာခေါ်ထုတ်သွားပြီးနောက် ဒီ​နေ့အထိပျောက်ဆုံးသွားခဲ့ပါတယ် ။

“စစ်တပ်ဘက်ကသတင်းအရင်းမြစ်တွေဆီကနေကြားရတာဆေးထိုးသတ်လိုက်တယ်ဆိုတဲ့သတင်းကနောက်ဆုံးပဲ”လို့ ဗကသကျောင်းသားတဦးကပြောပါတယ်။

မန္တလေးသပိတ်ခေါင်းဆောင် ကိုသူရအောင်ကိုလည်း ပြည်သူ​တွေမှတ်မိကြအုံးမယ်ထင်ပါတယ်။အသက်၁၉နှစ်အရွယ် လူငယ်သပိတ်ခေါင်းဆောင်ကိုသူရ​အောင်ကို အရှင်မရရင် အသေအရယူဖို့ ၂၀၂၁ခုနှစ်ထဲမှာ အမိန့်ပေးစေခိုင်းသူတွေထဲကတဦးဟာဗိုလ်မှူးချုပ်သူရိန်ထွန်းပါဝင်ခဲ့ပါတယ်။

၂၀၂၂ခုနှစ်၊ဖေဖော်ဝါရီလ၈ရက်နေ့မှာ ကိုသူရအောင်၊ကိုလှမျိုးအောင်၊ကိုရဲဇင်ထွန်း(ခ)ကိုဖိုးလုံး ၊အလွတ်တန်းသတင်းထောက် (CJ)ကိုစိုးလင်းအောင်တို့ကို နေအိမ်တခုမှာစစ်တပ်ကအကြမ်းဖက်မ်းဆီးသွားခဲ့ပါတယ်။

၂၀၂၂ ခုနှစ်ဖေဖော်ဝါရီလလကုန်ပိုင်းမှာ ဖမ်းဆီးခံထားရသူ ကိုဖိုးလုံး၊ကိုစိုးလင်းအောင်နှင့် ကိုလှမျိုးအောင်တို့သုံးဦး အိုးဘိုအကျဥ်းထောင်ကိုရောက်လာပြီးတဲ့နောက် နမည်ဆိုးနဲ့ ​ကျော်ကြားတဲ့ နန်းတွင်းစစ်​ကြော​ရေးထဲကပြန်လာခေါ်သွားခဲ့ပါတယ် ။ နန်းတွင်းစစ်​ကြော​ရေးက ပြန်​ခေါ်သွားတဲ့ ၂၀၂၂ ခုနှစ် ​ဖေ​ဖော်ဝါရီ လကုန်ပိုင်းက​​နေဒီကနေ့အထိ သတင်းအစအနပျောက်ဆုံး​နေဆဲဖြစ်ပါတယ်။

၂၀၂၂ခုနှစ်၊ဧပြီလမှာတော့ကိုသူရအောင်တစ်​ယောက် နန်းတွင်းစစ်ကြောရေးမှာ ကျဆုံးကြောင်းသတင်းထွက်ပေါ်ခဲ့ပါသေးတယ်။ အဲဒီနောက် ဒီကနေ့ ကိုသူရအောင်အပါအဝင်သပိတ်အဖွဲ့ဝင်တွေအိုးဘိုထောင်ကိုရောက်မလာတော့သလို သတင်းအစအနလည်းမရတော့ပါဘူး။

နောက်တ​ယောက်ကတော့ အသက်၁၇နှစ်အရွယ်ကိုကျော်စွာဝင်း(ခ) Felixပါ။ကိုကျော်စွာဝင်းက ၂၀၂၂ခုနှစ် မတ်လမှာစစ်တပ်ရဲ့ဖမ်းဆီးခြင်းခံခဲ့ရသူပါ။ ကိုကျော်စွာဝင်းဟာ အစ္စလာမ်ဘာသာဝင်ဖြစ်ပြီး အစ္စလာမ်လူငယ်သပိတ်၊မန္တလေးသပိတ်၊ပြည်ကြီးတံခွန်မြို့နယ်သပိတ်တွေမှာ တက်တက်ကြွကြွဦးဆောင်ခဲ့သူပါ။

ကိုသူရအောင်ဖမ်းဆီးခံရပြီးတဲ့နောက် မြေပြင်သပိတ်တွေမှာထပ်မံဦးဆောင်လာတဲ့သူ့ကို စစ်တပ်ကအပြင်းအထန်လိုချင်ခဲ့ပါတယ်။လူမျိုး၊ ဘာသာမ​ရွေးဖိနှိပ်၊ ခွဲခြားမှုတွေလုပ်တဲ့စစ်တပ်ဟာကိုကျော်စွာဝင်းကိုဖမ်းဆီးချိန်ကတည်း အပြင်းအထန်ရိုက်နှက်အကြမ်းဖက်ပြီးဖမ်းဆီးသွားခဲ့တာလို့ အဲဒီတုန်းက မန္တလေးသပိတ်ကအဖွဲ့ဝင်တွေကပြောပါတယ်။

ဖမ်းဆီးသွားချိန်ကတည်းကသတင်းပြတ်​​တောက်ခဲ့တဲ့ကိုကျော်စွာဝင်းဟာလည်းတစ်လအကြာမှာမအေးနန္ဒစိုး၊ကိုသူရအောင်တို့လိုပဲ သတင်းတချို့ထွက်လာပြီးနောက် ယ​နေ့အထိပျောက်ဆုံးနေဆဲဖြစ်ပါတယ်။

ဒါဟာလူသိများသူတွေရဲ့ဖြစ်စဥ်တချို့ပဲရှိပါတယ်။၂၀၂၁ခုနှစ်ဒီဇင်ဘာလတုန်းက People Spring ရရှိခဲ့တဲ့ နန်းတွင်းစစ်ကြောရေးမှာ အဆက်အသွယ်ပျက်တောက်သွားတဲ့ လူငယ်တွေ၊မန္တလေးကသပိတ်အဖွဲ့ဝင်တွေရဲ့ စာရင်းဟာ သံဃာတွေအပါအဝင် ၃၀ ကျော်အထိရှိခဲ့ပါတယ်။

အဲဒီအချိန်တုန်းဗိုလ်မှူးချုပ်သူရိန်ထွန်းဟာ အောင်မြေသာစံမြို့နယ်ရဲမှူးကျော်ဇင်မြင့်ကို သပိတ်ဖြိုခွင်းဖို့ အမိန့်ပေးထားပါတယ်။ရဲမှူးကျော်ဇင်မြင့်ဟာ အာဏာသိမ်းခေါင်းဆောင်ကပေးတဲ့ပြည်သူ့ဝန်ထမ်းကောင်းဆုရခဲ့ပါတယ် ။ ​နောက်ပိုင်းမြို့နယ်ရဲမှူးကနေ မန္တလေးတိုင်းဒုတိယရဲမှူးကြီးအဖြစ်ရာထူးတိုးခဲ့ပါတယ် ။ မန္တ​လေးတိုင်းဒုတိယရဲမှူးကြီးအဖြစ် တက်ကြွ​နေတဲ့ ဒုရဲမှူးကြီးကျော်ဇင်မြင့်တစ်​ယောက်က​တော့တော်လှန်​ရေးအင်အားစု​တွေရှိတဲ့​နေရာကို စစ်ကြောင်းထိုးဖို့သွား​နေရင်းတောင်သာ-မြင်းခြံလမ်းပိုင်းမှာ ၂၀၂၄ ခုနှစ် မတ်လမှာ မိုင်းဆွဲခံရပြီး သေဆုံးခဲ့ပါတယ်။

ဗိုလ်မှူးချုပ်သူရိန်ထွန်းဟာ အာဏာသိမ်း​ခေါင်း​ဆောင်နဲ့ စစ်​​ကောင်စီအတွက် မန္တ​လေးတိုင်းစစ်ဌာနချုပ်မှာ ​ဆောင်ရွက်​ပေးခဲ့တာ​တွေအတွက်၂၀၂၂ ခုနှစ်မှာ ဗိုလ်မှူးချုပ်ရာထူးတိုးခဲ့သလို ၊ အာဏာသိမ်း​​ခေါင်း​ဆောင်ကချီးမြှင့်တဲ့စီမံထူးချွန်တံဆိပ်(ပထမအဆင့်)ကိုပါရခဲ့​ထားတာပါ။

အခု​တော့သမိုင်းဘီးတပတ်လည်တဲ့ကာလလို့ပြောရပါမယ် ။ ၂၀၂၁ နဲ့ ၂၀၂၂ မှာ မန္တ​လေးမြို့မှာ ဆန္ဒပြပြည်သူ​တွေကို အကြမ်းဖက်ခဲ့တဲ့ ၊ဆန္ဒပြလူငယ်​တွေကိုနန်းတွင်းစစ်​ကြော​ရေးမှာ ရက်ရက်စက်စက် နှိပ်စက်သတ်ဖြတ်မှု​တွေမှာ အဓိကတာဝန်ရှိသူတစ်ဦးဖြစ်တဲ့ ဗိုလ်မှူးချုပ် သူရိန်ထွန်းဟာလည်းအညာကတော်လှန်ရေးတပ်တွေပါ ပါဝင်တိုက်ခိုက်​နေတဲ့ ရခိုင်ပြည်နယ်တိုက်ပွဲမှာ အာရက္ခစစ်သည်​တွေ​ရှေ့​မှောက်မှာ ဒူးတုပ်နေရပါပြီ။

AA က ​​​မောင်​တောမြို့နယ်မှာ​နောက်ဆုံးကျန်တဲ့အမှတ် (၅)နယ်ခြား​စောင့်ရဲတပ်ဖွဲ့ခွဲ (နခခ- ၅)စခန်းသိမ်းတိုက်ပွဲမှာ စစ်ဆင်​ရေးကွပ်ကဲမှုဌာနချုပ်-စကခ (၁၅)တပ်မမှူး ဖြစ်​နေတဲ့ သူ့ကိုစစ်သုံ့ပန်းအဖြစ် ဒီဇင်ဘာ ၈ ရက်မှာဖမ်းဆီးနိုင်ခဲ့တာပါ။CDM ဗိုလ်ကြီးဇင်​ယော်က​တော့ မန္တ​လေးမြို့မှာစစ်​ကောင်စီကျူးလွန်​ခဲ့တဲ့ စစ်ရာဇဝတ်မှု​တွေအတွက်အ​ရေးကြီးသက်​သေတစ်​ယောက်ကိုဖမ်းဆီးနိုင်ခဲ့တာလို့​ပြောပါတယ် ။

မန္တလေးမြို့က ပြည်သူ​တွေ နဲ့ နိုင်ငံရေးအသိုင်းအဝိုင်းကတော့ မအေးနန္ဒာစိုးအပါအဝင် ပျောက်ဆုံးခဲ့တဲ့လူငယ်တွေအကြောင်း ဗိုလ်မှူးချုပ်သူရိန်ထွန်းကို စစ်မေးဖို့ AAကိုတောင်းဆိုရေးသားနေကြပါတယ်။ ။

●ဗိုလ်မှူးချုပ်သူရိန်ထွန်း အ​ကြောင်းဆက်စပ်​ဆောင်းပါးကို​အောက်ပါလင့်မှာဖတ်ရှုနိုင်ပါတယ်။

https://www.facebook.com/share/p/14ZcRtibgq

(မန္တ​လေးမြို့ရှိ နန်းတွင်းစစ်​ကြော​ရေးမှာ ဖမ်းဆီးနှိပ်စက် စစ်​ဆေးခံခဲ့ရပြီး​ ​ပျောက်ဆုံးခဲ့တဲ့ သပိတ်​ခေါင်း​ဆောင်အချို့နဲ့ AA ကဖမ်းဆီးထားလို့ ဒူး​ထောက်​နေတဲ့ ဗိုလ်မှူး ချုပ်သူရိန်ထွန်း။ဓါတ်ပုံ-AA Info Desk ၊ File Photo)