“နတ်သံကွင်းတိုက်ပွဲဟာစစ်ကောင်စီရဲ့ ‌အဓိကထောက်ပို့လမ်းကြောင်းဖြစ်သလိုစစ်တောင်းမြစ်အရှေ့ဘက်ကမ်းကို ထိန်းချုပ်ဖို့အတွက်၊ သူတို့ရဲ့ ဆက်သွယ်ရေးလမ်းကြောင်းကိုဖြတ်တောက်ဖို့”

▪︎အမှတ် (၂ )စစ်ဒေသ၊ ဒုစစ်ဒေသခွဲမှူး ရဲ​ဘော်တင်ဦးနဲ့​မေးမြန်းခန်း

ကရင်အမျိုးသားအစည်းအရုံး(KNU)၊တပ်မဟာ(၃)နယ်မြေညောင်လေးပင်ခရိုင် ၊ နတ်သံကွင်းမြို့နဲ့ အနီးဝန်းကျင်ရှိစစ်ကောင်စီတပ်စွဲရာနေရာ ငါး​နေရာကို KNLA နဲ့PDF ပူး​ပေါင်းတပ်ဖွဲ့က ဇွန် ၆ ရက်နံနက်မှာတစ်ပြိုင်တည်းတိုက်ခိုက်ခဲ့ပါတယ်။ရေတွင်းကုန်းလမ်းခွဲကင်းစခန်း၊နတ်သံကွင်းမြို့ရဲစခန်း၊ နတ်သံကွင်းတံတားထိပ်ရှိရဲနဲ့ပူးပေါင်းတပ်စခန်း၊ ကွင်းချောင်းဝအရှေခြမ်းရှိတပ်နဲ့ပြည်သူ့စစ်ပူးပေါင်းတပ်စခန်းနဲ့ ဘုံသတောစခန်းတို့ကို တိုက်ခိုက်ခဲ့တာဖြစ်ပါတယ်။ စစ်ကောင်စီတပ်ဖွဲ့ဝင် ၄၀ဦးသေဆုံးပြီး ၁၂ဦး ဒဏ်ရာရရှိခဲ့ပြီး​တော့ KNLA/PDF ပူး​ပေါင်းတပ်က၄ ဦးကျဆုံးပြီး၁၂ ဦးဒဏ်ရာရရှိခဲ့တယ်လို့ KNU ဗဟိုကထုတ်ပြန်ထားပါတယ်။ နတ်သံကွင်းတိုက်ပွဲမှာပါဝင်ခဲ့တဲ့အမှတ် (၂ )စစ်ဒေသ၊ ဒုစစ်ဒေသခွဲမှူး ရဲ​ဘော်တင်ဦး ကို People’s Spring က ဆက်သွယ်မေးမြန်းထားတာကို ​ဖော်ပြ​ပေးလိုက်ပါတယ်။

တင်မြင့်/People’s Spring

မေး – နတ်သံကွင်းတိုက်ပွဲက အောင်မြင်တဲ့စစ်ဆင်ရေးလို့ သိရပါတယ်။ နတ်သံကွင်းကို ဘာကြောင့်ပစ်မှတ်ထားတိုက်ခိုက်ခဲ့တာလဲ သိပါရစေ။

ဖြေ – နတ်သံကွင်းတိုက်ပွဲဟာစစ်ကောင်စီရဲ့ ‌အဓိကထောက်ပို့လမ်းကြောင်းဖြစ်သလိုစစ်တောင်းမြစ်အရှေ့ဘက်ကမ်းကို ထိန်းချုပ်ဖို့အတွက်၊ သူတို့ရဲ့ ဆက်သွယ်ရေးလမ်းကြောင်းကိုဖြတ်တောက်ဖို့။ အကြမ်းဖက်စစ်ကောင်စီရဲ့ နယ်မြေထိန်းချုပ်ရေးလမ်းကြောင်းနဲ့ အဓိက ထောက်ပို့လမ်းကြောင်းကို ဖြတ်တောက်ဖို့ ဒီစစ်ဆင်ရေးကိုဆောင်ရွက်ခဲ့တာဖြစ်ပါတယ်။

မေး – စစ်ကောင်စီကလေကြောင်းတိုက်ခိုက်မှုတွေဘယ်လောက်လုပ်ခဲ့ပါသလဲ။

Public Service Announcement

ဖြေ – လေကြောင်းကနေ သုံးကြိမ်တိုက်ခိုက်ခဲ့တယ်။ လေကြောင်းတိုက်ခိုက်မှုက စစ်ဆင်ရေးပုံစံမဟုတ်ဘူးဗျ။ အရပ်သားတွေကို အဓိကထားပစ်တာ။ အရပ်သားပစ်မှတ်တွေကိုပဲ အဓိကထားတာ။ကျွန်တော်တို့ကိုယ်တိုင်စစ်မြေပြင်မှာရှိနေခဲ့တာပါ။

မေး – နတ်သံကွင်းတံတားကို ဖျက်ဆီးခဲ့တဲ့အပေါ် ဒေသခံပြည်သူတွေကို ဘာပြောချင်လဲ။

ဖြေ- အဓိကကတော့ ပြည်သူတွေက သွားနေတဲ့ ပုံမှန်လမ်းကြောင်းတွေ ရှိပါတယ်။ဒီတံတားဆိုတာက စစ်တပ်ရဲ့ အဓိက ထောက်ပို့လမ်းကြောင်းပါ။ ပြည်သူတွေအတွက်တော့ အခက်အခဲအများကြီးမရှိဘူး။ စစ်တပ်အတွက်တော့ တော်တော် နစ်နာသွားပါတယ်ဗျ။ကျွန်တော်တို့ကဘယ်လိုစစ်ဆင်ရေးပဲဖြစ်ဖြစ် အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနက မူတစ်ခုချထားပါတယ်။ အရပ်သား ထိခိုက်မှုအနည်းဆုံးဖြစ်အောင်လုပ်ပါဆိုတဲ့မူရှိပါတယ်။အဲဒီမူအတိုင်း အရပ်သား ထိခိုက်မှုအနည်းဆုံးဖြစ်အောင် ဆောင်ရွက်ပါတယ်။ဒီလမ်းကြောင်းဖြတ်တောက်တာကလည်း အရပ်သားထိခိုက်မှုထက်စာရင် စစ်ကောင်စီအတွက် ထိခိုက်မှုက ပိုပါတယ်။ ဒါကြောင့် လိုအပ်ချက်အရ ဖျက်ဆ‌ီးခဲ့တာပါ။

မေး – တိုက်ပွဲမှာ ထိခိုက်မှုအခြေအ‌နေကို သိပါ‌ရစေ။

ဖြေ – ကျွန်‌တော်တို့ရဲ့ တော်လှန်ရေးရဲဘော် လေးယောက် အသက်စွန့်သွားရပါတယ်။ စစ်ကောင်စီဘက်ကတော့ ၃၀ ဝန်းကျင်သေပါတယ်။ ဒီထက်များနိုင်ပါတယ်။ အတိအကျကတော့ စစ်မြေပြင်ဆိုတာ သိတဲ့အတိုင်းပဲအတိအကျစာရင်းကောက်ဖို့ ခက်ခဲပါတယ်။ သို့ပေမယ့် မျက်မြင်အနေနဲ့ ကျွန်တော်တို့ရဲ့ source တွေအရ သူတို့ဘက်မှာ ၃၀ ရဲ့အထက်မှာ သေဆုံးပါတယ်။

မေး – တိုက်ပွဲနေ့ကမြေပြင်အခြေအနေကိုပြန်ပြောပြပေးပါလား။

ဖြေ – မနက် ၄ နာရီမှာ ကျွန်‌တော်တို့ရဲ့စစ်ဆင်ရေးကိုစတင်ခဲ့ပြီး ၇နာရီ ခွဲလောက်မှာတော့ စစ်ဆင်ရေးကိုအကုန်လုံးအောင်မြင်အောင်ဆောင်ရွက်နိုင်ခဲ့ပါတယ်။သို့ပေမယ့်တစ်နေကုန်ကတော့ နယ်မြေရှင်းလင်းရေးကိစ္စတွေ၊ ဟန့်တားတဲ့ကိစ္စတွေ ရှိခဲ့ပါတယ်။

မေး – တိုက်ပွဲမှာ ဘယ်သူတွေ ပါခဲ့လဲ။

ဖြေ – အဓိကဆောင်ရွက်သွားတာတော့ KNLA ရယ် PDF တပ်ဖွဲ့ရယ်ပါ။ ကျွန်တော်တို့ ပူးပေါင်းစစ်ကြောင်းပါ။

မေး – ဘာဖြည့်စွက်ပြောလိုပါသလဲ။

ဖြေ – ကျွန်တော်တို့အနေနဲ့က တော်လှန်ရေးကိုအဆုံးအထိ သွားမှာဖြစ်ပါတယ်။ ၂၀၂၃ က အလှည့်အပြောင်းဆိုတဲ့အတိုင်း ဒီအလှည့်အပြောင်းကတကယ်ဖြစ်ပေါ်လာမှာပါ။ အဲဒီအတွက်ကျွန်တော်တို့အားလုံးကြိုးစားနေကြပါတယ်။ ကျနော်တို့အားလုံးအိမ်ပြန်ကြပါမယ်။ ကျနော်တို့အိမ်ပြန်ခရီးက ကြမ်းတမ်းမယ်။ ခက်ခဲမယ်။ သို့ပေမယ့် ဒီမိုးကုန်ရင်တော့ကျနော်တို့အိမ်ပြန်ကြပါမယ်ဗျ။