Connect with us

Hi, what are you looking for?

LuduNwayOo

News

အကြမ်းဖက်စစ်ကောင်စီတပ်ဖွဲ့ဝင်တွေက ဗိုလ်ချုပ်လမ်းက ကား ၁၅ စီးလောက်ကို ဖျက်ဆီး

မေ ၂ ရက် ည ၈ နာရီ သံပုံးတီးချိန်မှာ ဗိုလ်ချုပ်အောင်ဆန်းလမ်းတစ်လျှောက် ၄၅၊ ၄၆၊ ၄၇ လမ်းတွေကို စစ်တပ်နဲ့ ရဲတွေဝင်လာပြီး ရပ်ထားတဲ့ကားတွေကို ထုခွဲရိုက်နှက်သွားတာကြောင့် ကားအစီးရေ ၁၅ စီးထက်မနည်း ဖျက်ဆီးခံခဲ့ရတယ်လို့ အဲဒီမှာနေထိုင်သူတစ်ဦးက ပြောပါတယ်။

စစ်ကောင်စီတပ်ဖွဲ့ဝင်တွေ ဖျက်ဆီးသွားသော ကားတစ်စီး (ဓာတ်ပုံ - CJ)

”သံပုံးတီးလို့ကွ၊ သံပုံးတီးလို့ကွ” လို့အော်ပြီး လုပ်သွားတာပါလို့ ဆိုပါတယ်။
သံပုံးတီးလို့ ကြိမ်းမောင်း၊ အိမ်တွေကို ခဲတွေနဲ့ပစ်ခတ်ဖျက်ဆီးရုံတင်မက လမ်းဘေးရပ်ထားတဲ့ ကားတွေကို ထုခွဲရိုက်နှက်သွားသလို မှုတ်ဆေးနဲ့လည်း စာတွေရေးသွားကြတယ်လို့ သိရပါတယ်။

စစ်ကောင်စီတပ်ဖွဲ့ဝင်တွေ ဖျက်ဆီးသွားသော ကားတစ်စီး (ဓာတ်ပုံ – CJ)

ကားအစီးရေ ၁၅ စီးလောက် ဖျက်ဆီးခံလိုက်ရတာဖြစ်ပြီး နေအိမ်မှန်တွေကတော့ မေးမနေဘဲ လမ်းကြုံရင်သာ ဝင်ကြည့်လိုက်ပါတော့လို့ အဲ့ဒီဝန်းကျင်မှာနေတဲ့ အမျိုးသားတစ်ဦးက ဓာတ်ပုံမှတ်တမ်းတွေနဲ့အတူ လူမှုကွန်ရက်မှာ တင်ထားတာဖြစ်ပါတယ်။

စစ်ကောင်စီတပ်ဖွဲ့ဝင်တွေ ဖျက်ဆီးသွားသော ကားတစ်စီး (ဓာတ်ပုံ – CJ)

“စစ်အုပ်စုက လူထုဆီက အကြောက်တရားနဲ့ နာခံမှုကို ရမယ်ထင်ပြီး အနိုင်ကျင့် ယုတ်မာပြနေတာပါ။ ဒါပေမဲ့ သူတို့ပြန်ရတာက လူထုရဲ့ အမုန်းတရားနဲ့ ရွံရှာစက်ဆုတ် အော့နှလုံးနာမှုပါပဲ”လို့ အဲ့ဒီအမျိုးသားက မှတ်ချက်ပြုထားပါတယ်။

စစ်ကောင်စီတပ်ဖွဲ့ဝင်တွေ ဖျက်ဆီးသွားသော ကားတစ်စီး (ဓာတ်ပုံ – CJ)

အာဏာသိမ်းမှုကို ဆန့်ကျင်တဲ့ သံပုံးတီးလှုပ်ရှားမှုကို အာဏာသိမ်းပြီးနောက်နေ့ ဖေဖော်ဝါရီ ၂ ရက်ကတည်းက ရပ်ကွက်တွေတိုင်းမှာ မပျက်မကွက် လုပ်ခဲ့ကြပေမဲ့ ဒီနောက်ပိုင်းမှာ သံပုံးတီးတဲ့အိမ်တွေကို အကြမ်းဖက်စစ်ကောင်စီတပ်ဖွဲ့ဝင်တွေနဲ့ ရဲတွေက လေးခွနဲ့ပစ်တာ၊ သေနတ်ပစ်ဖောက်တာ၊ ဆဲဆိုကြိမ်းမောင်းတာ၊ အနီးအနားဝန်းကျင်က ပြည်သူပိုင်ပစ္စည်းတွေကို ဖျက်ဆီးတာတွေ တောက်လျှောက်လုပ်နေတာဖြစ်ပါတယ်။