ကချင်ပြည်နယ် မိုးမောက်မြို့နယ် တိုက်ပွဲတွင် စစ်ကောင်စီတပ်က အချင်းချင်း လေကြောင်းမှ မှားယွင်းဗုံးကြဲခဲ့ခြင်း၊ ရွှေကူမြို့နယ်တွ ရေကြောင်းမှ စစ်ကူလာသည့်တပ်ကို ကချင်လွတ်မြာက်ရေးတပ်မတော် (KIA)က ကြားဖြတ်တိုက်ခိုက်ခဲ့ခြင်း တို့ကြောင့် စစ်ကောင်စီတပ်ဖွဲ့ဝင် အများအပြား သေဆုံးခဲ့သည်။
မေလ ၆ရက် ညပိုင်းက ရွှေကူ ဘက်မှဧရာဝတီမြစ်အတိုင်း တက်လာသည့် စစ်ကောင်စီ တပ်ဖွဲ့ဝင်များလိုက်ပါလာသော ရေယာဉ်ကို KIA က ကြားဖြတ်တိုက်ခိုက်ခဲ့ရာ စက်လှေတစ်စီးထိခိုက်ပျက်စီးသွားပြီး ရေယာဉ်တစ်စီးနောက်ပြန်လှည့်သွားကြောင်း KIA က အတည်ပြုသည်။
“အဲဒီမှာ တင်လာတဲ့ သူတွေကိုတော့ အခြားသော စက်လှေတွေနဲ့ လာပြီးမှ ကယ်ဆယ်ကြတယ်ဆိုတဲ့ သတင်းကြားပါတယ် ။ ဘယ်လောက်ထိခိုက်တယ်ဆိုတာ တွေ မကြားရသေးပါဘူး။ ထိခိုက်မှု များတယ်ဆိုတာ အဲဒီလောက်ပဲ ကြားပါတယ်”ဟု KIA သတင်းနှင့် ပြန်ကြားရေးဌာန တာဝန်ခံ ဗိုလ်မှူးကြီး နော်ဘူက ပြောသည်။ ဒေသခံအချို့က အဆိုပါစစ်ကောက်စီစက်လှေကို KIA ကတိုက်ခိုက်
နစ်မြှစ်ရာစစ်ကောင်စီတပ်ဖွဲ့ဝင် ၃၀ ဦးသေဆုံးခဲ့ကြောင်း ပြောသည်။
ထို့အပြင်KIA က သိမ်းပိုက်ထားသည့် အလော့ဘွမ်တပ်စခန်းတည်ရှိရာ မိုးမောက်မြို့နယ်တွင်လည်း စစ်ကောင်စီက ယနေ့ဆက်လက်၍ လေကြောင်းတိုက်ခိုက်မှု၊ မြေပြင်ထိုးစစ်ဆင်နေစဥ် တိုက်လေယာဥ်က စစ်ကောင်စီတပ်ဖွဲ့ဝင်များ၏ ကြည်းကြောင်းကိုမှားယွင်းတိုက်ခိုက်မိခဲ့ကြောင်း ၎င်းက ဆိုသည်။
“မနေ့ကလည်း သူတို့ လေယာဉ်ပျံနဲ့ ဗုံးကြဲတာ သူတို့ဆီပဲ ကျသွားတယ်လို့ ကြားပါတယ်။ တော်တော်များများဒဏ်ရာရတယ်လို့ ကြားပါတယ်”ဟု ဗိုလ်မှူးကြီးနော်ဘူက ပြောသည်။
Public Service Announcement
ကချင်ဒေသခံ တစ်ဦးကလည်း” မြို့သစ်နဲ့ ကုန်းလောမှာတော့ တိုက်ပွဲက တောက်လျှောက်ပါပဲ။ မနေ့ကတော့ စစ်ကောင်စီဘက်က တပ်ရင်းတစ်ရင်းလောက် ပြုတ်သွားတယ်ထင်တယ်။ လူနာတောင် ၈၀ကျော်လို့ ပြောတယ် သေတာက ဘယ်လောက်လဲတော့ မသိဘူး”ဟု ပြောသည်။ ဒေသခံအချို့က အဆိုပါမှားယွင်းတိုက်ခိုက်မှုတွင် ကြည်းကြောင်းမှစစ်ကောင်စီတပ်ဖွဲ့ဝင် ၃၀ ဦးသေဆုံးခဲ့ကြောင်းပြောသည်။
မိုးမောက်မြို့နယ် မြို့သစ်ရွာနှင့် ကုန်းလောရွာတစ်ဝိုက်တွင် ဧပြီ တတိယအပတ်မှစ၍ တိုက်ပွဲများ နေ့စဉ်နီးပါး ဖြစ်ပွားခဲ့ရာ စစ်ကောင်စီက လေကြောင်းတိုက်ခိုက်မှု ၊ လက်နက်ကြီး ပစ်ခတ်မှုများ စဉ်ဆက်မပြတ် ပြုလုပ်ခဲ့သည်။
ဧပြီလတွင်လည်း စစ်ကောင်စီက အချင်းချင်း မှားယွင်းဗုံးကြဲခဲ့၍ စစ်ကောင်စီ တပ်ဖွဲ့ဝင် အများအပြား သေဆုံးဒဏ်ရာရရှိခဲ့ဖူးသေးသည်။
