မြန်မာစစ်တပ်ကို ငွေပေးချေမှုတွေ ဆိုင်းငံ့မယ်လို့ Total ကုမ္ပဏီ ကြေညာ

Totalဟာ မြန်မာ အစိုးရပိုင် စွမ်းအင် ကုမ္ပဏီတစ်ခုနဲ့ ပူးပေါင်းပြီး ရတနာ ဓာတ်ငွေ့ပိုက်လိုင်း စီမံကိန်းကို စီမံ ကိုင်တွယ်နေတာ ဖြစ်ပါတယ်။ မေလ ၁၂ ရက်က မုတ္တမ ဓာတ်ငွေ့ သယ်ယူဖြန့်ချိရေး ကုမ္ပဏီ လီမိတက် (MGTC)ရဲ့ ရှယ်ယာ ပိုင်ရှင်တွေနဲ့ တွေ့ဆုံ အစည်းအဝေး လုပ်ခဲ့ပြီးတဲ့နောက် ဒီဆုံးဖြတ်ချက်ကို ချမှတ်ခဲ့တာလို့ Totalက ဆိုပါတယ်။

MGTCမှာ Totalနဲ့အတူ တခြား ပြင်သစ် ကုမ္ပဏီ တစ်ခုဖြစ်တဲ့ Chevron၊ မြန်မာ အစိုးရပိုင် မြန်မာ့ ရေနံနဲ့ သဘာဝဓာတ်ငွေ့လုပ်ငန်း (MOGE)တို့ ပူးပေါင်း မြှုပ်နှံထားကြပါတယ်။ MOGEဟာ စစ်တပ် အာဏာသိမ်းခဲ့တဲ့ ဖေဖော်ဝါရီ ၁ ရက်ကစလို့ စစ်ကောင်စီရဲ့ ထိန်းချုပ်မှုအောက်ကို ရောက်ရှိနေခဲ့ပါတယ်။

မြန်မာနိုင်ငံက မတည်ငြိမ်တဲ့ အခြေအနေတွေကို အကြောင်းပြုပြီး ရှယ်ယာရှင်တွေဆီ ငွေကြေး ခွဲဝေပေးနေတာကို ဆိုင်းငံ့ထားမှာဖြစ်ကြောင်း၊ ဒီဆုံးဖြတ်ချက်ဟာ ဧပြီ ၁ ရက်က စတင် အသက်ဝင်ကြောင်း Totalရဲ့ ထုတ်ပြန်ချက်မှာ ဖော်ပြထားပါတယ်။

ဒါ့အပြင် မြန်မာနိုင်ငံမှာ လူ့အခွင့်အရေး ချိုးဖောက်မှုတွေနဲ့ အကြမ်းဖက် လုပ်ဆောင်မှုတွေကို ကန့်ကွက် ရှုတ်ချကြောင်း၊ အာဏာသိမ်း စစ်အစိုးရအပေါ် ဥရောပ သမဂ္ဂ၊ ဒါမှမဟုတ် အမေရိကန် အစိုးရက ချမှတ်လာနိုင်တဲ့ အရေးယူ ပိတ်ဆို့မှုတိုင်းကို လိုက်နာသွားမှာ ဖြစ်ကြောင်းလည်း Totalက ထည့်သွင်း ကြေညာခဲ့ပါတယ်။

Public Service Announcement

မြန်မာ့ ဒီမိုကရေစီရေး လှုပ်ရှားသူတွေက စစ်အစိုးရအတွက် ငွေကြေး ထောက်ပံ့တာတွေ ရပ်ဆိုင်းဖို့ Totalအပေါ် အပြင်းအထန် ဖိအားပေး တောင်းဆိုနေခဲ့ပါတယ်။ MGTCရဲ့ စီမံခန့်ခွဲမှုအောက်မှာ ရှိနေတဲ့ ပိုက်လိုင်းဟာ ရတနာ ကမ်းလွန်ရေနံမြေက ဓာတ်ငွေ့တွေကို သယ်ယူဖို့ သွယ်တန်းထားတာ ဖြစ်ပါတယ်။