ကရင်အမျိုးသားအစည်းအရုံး(KNU/KNLA) တပ်မဟာ (၅)နယ်မြေတွင် နှစ်ရက်အတွင်းပစ်ခတ်မှုရှစ်ကြိမ်ဖြစ် ပွားခဲ့ပြီး အကြမ်းဖက်စစ်အုပ်စုတပ်ဖွဲ့ဝင် ၁၁ဦး သေဆုံးကာ ၁၆ဦးဒဏ်ရာရရှိခဲ့ကြောင်း KNU သတင်းနှင့်ပြန်ကြားရေးဌာန Thoolei Newsက ယနေ့သတင်းဖော်ပြသည်။
တပ်မဟာ(၅)နယ်မြေ မူတြော်ခရိုင်(ဖာပွန်ခရိုင်)အတွင်း ဇူလိုင် ၁၂ရက်နှင့် ၁၃ရက်နေ့များ၌ ဖြစ်ပွားသည့် စစ်ရေးအခြေအနေများကို သတင်းဖော်ပြခဲ့ခြင်းဖြစ်ပြီး ပစ်ခတ်မှုအတွင်း ကရင်အမျိုးသားလွတ်မြောက်ရေးတပ်မတော် KNLA ဘက်၌ ထိခိုက်ကျဆုံးမှုမရှိဟု ဆိုသည်။
KNU တပ်မဟာများအနက် တပ်မဟာ(၅)နယ်မြေတွင် စစ်ကောင်စီနှင့် တိုက်ပွဲများ၊ ကြားဖြတ်တိုက်ခိုက်မှုများ နေ့စဉ်ဖြစ်ပွားနေခြင်းဖြစ်သည်။
ဇူလိုင် ၅ရက်မှ ၇ရက်အကြားတွင်လည်း အဆိုပါ KNU တပ်မဟာ(၅)နယ်မြေတွင် တိုက်ပွဲ ၅ကြိမ်ဖြစ်ပွားခဲ့ရာ စစ်ကောင်စီတပ်ဖွဲ့ဝင် ၁၀ဦးထက်မနည်းသေဆုံးခဲ့ကြောင်း တပ်မဟာ(၅)၏ Mutraw News က သတင်းထုတ်ပြန်ထားသည်။
Public Service Announcement
KNU တပ်မဟာ(၅)နယ်မြေတွင် စစ်ကောင်စီတပ်နှင့် တိုက်ပွဲများ ကြားဖြတ်တိုက်ခိုက်မှုများ နေ့စဉ်နီးပါးဖြစ်ပွားနေကြောင်း ဇွန်လအတွင်းက တိုက်ပွဲရာနှင့်ချီ၍ ဖြစ်ပွားခဲ့ရာ စစ်ကောင်စီတပ်ဖွဲ့ဝင် ၁၅၀ ကျော်သေဆုံးခဲ့ကြောင်း တပ်မဟာ(၅) ပြောရေးဆိုခွင့်ရှိသူ ဒုဗိုလ်မှူးကြီးစောကလယ်ဒိုက ပြောကြားထားသည်။
