ကုလသမဂ္ဂဒုက္ခသည်များဆိုင်ရာအေဂျင်စီ(UNHCR) ဟာ ချင်းပြည်နယ်၊ မင်းတပ်မြို့ကို ဒီနေ့ရောက်ရှိခဲ့ပြီး လူသားချင်းစာနာမှုအကူအညီပစ္စည်းများကို တစ်ပတ်ကြာ ထောက်ပံ့ဖြန့်ဝေပေးမယ်လို့ သတင်းထုတ်ပြန်လိုက်ပါတယ်။
“မနက်ဖြန်မှစ၍ ရက်သတ္တပတ်လုံး UNHCRသည် COVID-19 ကာကွယ်ရေးအတွက် တကိုယ်ရေသုံး အကာအကွယ် ပစ္စည်းကိရိယာများအပါအဝင်၊ အစားအစာမဟုတ်သည့် ပစ္စည်းများအနက်မှ တာ ပေါ်လင်များ၊ ခြင်ထောင်များ၊ ဖျာများ၊ စောင်များ၊ မီးဖို ချောင်သုံးပစ္စည်းများ၊ နေရောင်ခြည်စွမ်းအင်သုံး မီးအိမ်များကို ကူညီ ထောက်ပံ့ဖြန့်ဖြူးသွားမည် ဖြစ်ပါသည်”လို့ UNHCR ရဲ့ထုတ်ပြန်ချက်မှာ ဖော်ပြပါတယ်။
လိုအပ်တဲ့ ကူညီထောက်ပံ့မှုတွေကနေ လူဦးရေ ၅၀၀၀ (အိမ်ထောင်စုပေါင်း ၁၀၀၀)အထိ အကျိုးခံစားရမယ်လို့ UNHCR က မျှော်လင့်ထားပါတယ်။
UNHCR ရဲ့ လုပ်ဆောင်မှုဟာ လူသားချင်းစာနာထောက်ထားသော၊ ဘက်မလိုက်သော၊ လူသားချင်းစာနာထောက်ထားမှု အကူအညီလိုအပ်နေသူများအပေါ် အခြေပြုတဲ့ လုပ်ငန်းစဉ် သပ်သပ် ဖြစ်ပြီး ဖြန့်ဝေမှုများကို UNHCR ဝန်ထမ်းများနဲ့ ယုံကြည်စိတ်ချရတဲ့ မိတ်ဖက်အဖွဲ့အစည်းများမှ အကူအညီလိုအပ်နေသူ တစ်ဦးချင်းနှင့် ရပ်ရွာလူထုသို့ လွှဲပြောင်းပေးအပ်မှာဖြစ်တယ်လို့ ဆိုပါတယ်။
Public Service Announcement
UNHCRဟာ ၎င်းတို့ရဲ့ လိုအပ်ချက်များနဲ့ စိုးရိမ်မှုများကို ပိုမိုသိရှိနားလည်နိုင်ဖို့အတွက် ရပ်ရွာလူထုများ၊ ဘာသာရေးအုပ်စုများမှ ကိုယ်စားလှယ်များနဲ့ တွေ့ဆုံမှာဖြစ်ပြီးချင်းပြည်နယ်နဲ့ နိုင်ငံတဝန်းရှိ အဓိကကျတဲ့ လူသားချင်း စာနာထောက်ထားမှုဆိုင်ရာ အကူအညီ လိုအပ်နေသူများထံ အထောက်အပံ့ တွေ ပေးအပ်ဖို့ ကတိပြုတယ်လို့ ထုတ်ပြန်ထားပါတယ်။
