မြန်မာပြည်သူများကိုကူညီရန် အရေးပေါ် ရန်ပုံငွေ ဒေါ်လာ ၈၆သန်းရရှိရန် ကြိုးပမ်းနေဟု WFP ထုတ်ပြန်

မြန်မာနိုင်ငံတွင် အကောင်အထည်ဖော်ဆောင်ရွက်လျက်ရှိသော ကုလသမဂ္ဂကမ္ဘာ့စားနပ်ရိက္ခာ အစီအစဥ် (WFP) ၏ အသက်ကယ်ဆယ်ရေးလုပ်ငန်းများကို ဆက်လက်လုပ်ကိုင်နိုင်ရန် ယခုလမှစ၍ ၂၀၂၂ ဇန်နဝါရီအထိ ကြားကာလ အရေးပေါ် ရန်ပုံငွေလိုအပ်ချက် အမေရိကန်ဒေါ်လာ (၈၆) သန်းရရှိရန်လည်း ကြိုးပမ်းလျက်ရှိကြောင်း WFPက ထုတ်ပြန်သည်။

WFP သည် မြို့ပြစားနပ်ရိက္ခာ အ‌ထောက်အပံ့စီမံချက်တစ်ခုကို မေလ၌ စတင်အကောင်အထည်ဖော်ဆောင်ရွက်ခဲ့ရာ ယနေ့အချိန်တွင် ရန်ကုန်တိုင်းဒေသကြီး လှိုင်သာယာနှင့် ဒဂုံဆိပ်ကမ်းမြို့နယ်များမှ ထိခိုက်လွယ်သူ လူဦးရေပေါင်း ၆၅၀,၀၀၀ အထိ တိုက်ရိုက်ကူညီပံ့ပိုးပေးနိုင်ခဲ့ပြီဖြစ်ကြောင်း ဖော်ပြထားသည်။

၎င်းတို့အနက်တွင် မိခင်များ၊ ကလေးငယ်များ၊မသန်စွမ်းသူများနှင့် သက်ကြီးရွယ်အိုများ အများစုပါဝင်သည်ဟု ဆိုသည်။

ထို့အပြင် မကြာသေးခင်က နိုင်ငံအနှံ့အပြားတွင် ဖြစ်ပွားခဲ့သော အခြေအနေမငြိမ်သက်မှုများကြောင့် နေရပ်စွန့်ခွာရွှေ့ပြောင်းခဲ့ရသူ ၁၇,၅၀၀ ဦးကိုလည်း ထောက်ပံ့ကူညီနိုင်ခဲ့ကြောင်း ထုတ်ပြန်ခဲ့သည်။

Public Service Announcement

နေရပ်စွန့်ခွာရွှေ့ပြောင်းခဲ့ရသူများအား ယခုသြဂုတ်လအတွင်း တိုးချဲ့ကူညီသွားရန် ဆောင်ရွက်လျက်ရှိ ကြောင်း ဖော်ပြသည်။

၂၀၂၁ ၏ ပထမခုနှစ်လအတွင်းတွင် WFP သည် မြို့ပြဒေသများနှင့် ကျေးလက်ဒေသများရှိ မြန်မာပြည်သူလူဦးရေ ၁ ဒဿမ ၂၅သန်းအတွက် စားနပ်ရိက္ခာ၊ ငွေသားနှင့် အာဟာရ အထောက်အပံ့များကို ပေးအပ်ထောက်ပံ့နိုင်ခဲ့ပြီဖြစ်ကြောင်း အသိပေးသည်။