အာဆီယံအထူးကိုယ်စားလှယ်အနေနဲ့ မြန်မာနိုင်ငံရဲ့ ဒီမိုကရေစီလိုလားသူတွေနဲ့ဆွေးနွေးဖို့လိုအပ်တယ်လို့ ဂျပန်အစိုးရက တိုက်တွန်းလိုက်ပါတယ်။
မြန်မာ့အရေးဖြေရှင်းဖို့ အာဆီယံက ခန့်အပ်လိုက်တဲ့ အထူးကိုယ်စားလှယ် Erywan Yusof ကို ဂျပန်နိုင်ငံခြားရေး ဝန်ကြီး Toshimitsu Motegi က ဩဂုတ် ၁၂ ရက်မှာ တယ်လီဖုန်းနဲ့ဆွေးနွေးရာမှာ အချိန်မဆိုင်းဘဲ မြန်မာနိုင်ငံကို သွားရောက်ဖို့နဲ့ အကြမ်းဖက်စစ်တပ်နဲ့သာမက ဒီမိုကရေစီလိုလားတဲ့အဖွဲ့တွေနဲ့ပါ တွေ့ဆုံဆွေးနွေးဖို့ တိုက်တွန်း ပြောဆိုခဲ့တာပါ။
“နိုင်ငံတကာအသိုင်းအ၀ိုင်းနဲ့ ဆက်ဆံပြောဆိုဖို့အရေးကြီးတယ်” လို့လည်း ဂျပန်နိုင်ငံခြားရေးဝန်ကြီးက အထူး ကိုယ်စားလှယ်ကို အလေးပေးပြောပါတယ်။
မြန်မာ့အရေးအပေါ် အာဆီယံအထူးကိုယ်စားလှယ်ရဲ့လှုပ်ရှားလုပ်ဆောင်မှုတွေကို ဂျပန်အစိုးရက အပြည့်အ၀ ကူညီမယ့်အကြောင်း Toshimitsu Motegi က အသိပေးပါတယ်။
Public Service Announcement
ဩဂုတ် ၈ ရက်က Kyodo News သတင်းဌာနရဲ့ ဖော်ပြချက်အရ အာဆီယံအထူးကိုယ်စားလှယ်ဟာ မြန်မာလူထုခေါင်းဆောင်၊ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နဲ့တွေ့ဆုံဖို့ အချိန်စောင့်ဆိုင်းရဦးမယ်လို့ ပြောပါတယ်။
မြန်မာပြည်ကိုအရေးပေါ်လာရောက်ဖို့လိုအပ်တာမှန်ပေမယ့် ကောင်းစွာပြင်ဆင်ထားတဲ့ခရီးစဉ်ဖြစ်ဖို့လိုအပ်တယ် လို့ အထူးကိုယ်စားလှယ်က ပြောပါတယ်။
အထူးကိုယ်စားလှယ်ရဲ့ မြန်မာပြည်ခရီးစဉ် ဦးစားပေးအစီအစဉ်ဟာ ကိုဗစ်-၁၉ ကပ်ရောဂါကြောင့် လူသားချင်းစာ နာမှုဆိုင်ရာအကျပ်အတည်းကို ဖြေရှင်းဖို့ဖြစ်မယ်လို့ ဆိုပါတယ်။
ကိုးကား – Anadolu Agency ၊ Kyodo News
