ကုလသမဂ္ဂကိုယ်စားလှယ်စိစစ်ရေးကော်မတီဟာ အမျိုးသားညီညွတ်ရေးအစိုးရရဲ့ ကိုယ်စား လှယ်ကို လက်ခံတာ ဒါမှမဟုတ် ဆုံးဖြတ်ချက်မချသေးဘဲ လက်ရှိကိုယ်စားလှယ် ဦးကျော်မိုး ထွန်းက ဆက်လက်ကိုယ်စားပြုတာ ဖြစ်နိုင်ခြေရှိတယ်လို့ မြန်မာနိုင်ငံဆိုင်ရာအထူးအကြံပေးကောင်စီ(SAC-M)က သုံးသပ်ပါတယ်။
ကုလသမဂ္ဂကျွမ်းကျင်ပညာရှင်သုံးဦးနဲ့ဖွဲ့စည်းထားတဲ့ SAC-M ဟာ မြန်မာ့အရေးနဲ့ပတ်သက်ပြီး သုံးသပ်ရှင်းလင်းချက်စာတမ်း ၄ စောင်ထုတ်ပြန်ဖို့ရှိနေပြီး ပထမဆုံးစာတမ်းဖြစ်တဲ့ ‘ကုလသမဂ္ဂ မှာ မြန်မာကိုယ်စားလှယ် အလားအလာ’ ကို ဩဂုတ် ၁၁ ရက်မှာ အင်္ဂလိပ်ဘာသာနဲ့ထုတ်ပြန်ခဲ့ ပါတယ်။
အဲဒီစာတမ်းမှာ လာမယ့် စက်တင်ဘာမှာ စတင်မယ့် ကုလသမဂ္ဂအထွေထွေညီလာခံက ဆုံး ဖြတ်နိုင်ခြေရှိတဲ့ ဆုံးဖြတ်ချက် ၄ ခုကို သုံးသပ်ထားပြီး NUG ရဲ့ ကိုယ်စားလှယ်ကို လက်ခံတာ၊ အကြမ်းဖက်စစ်ကောင်စီရဲ့ ကိုယ်စားလှယ်ကို လက်ခံတာ၊ ကိုယ်စားလှယ်လျှောက်ထားမှုနှစ်ခု ကို မဆုံးဖြတ်သေးဘဲ လက်ရှိ မြန်မာသံအမတ်ကြီး ဦးကျော်မိုးထွန်းဆက်ရှိတာနဲ့ မြန်မာကိုယ် စားလှယ်မထားဘဲ ထိုင်ခုံလွတ်ထားတာ စတဲ့ ဖြစ်နိုင်ခြေ ၄ မျိုးဖြစ်ပါတယ်။
အဲဒီဖြစ်နိုင်ခြေ ၄ ခုထဲကမှ NUG ကို လက်ခံတာနဲ့ ဦးကျော်မိုးထွန်းဆက်ရှိတာ နှစ်ခုက ဖြစ်နိုင်ခြေ များတယ်လို့ ဆိုထားတာပါ။
အကြမ်းဖက်စစ်ကောင်စီရဲ့ကိုယ်စားလှယ်လက်ခံခြင်းက ကုလမှာ အရင်က မရှိခဲ့ဖူးတဲ့ ဆုံးဖြတ်ချက်မျိုးဖြစ်ပြီး ထိုင်ခုံအလွတ်ထားတာကလည်း ကုလသမဂ္ဂပဋိဉာဉ်ကို ဆန့်ကျင်သလိုဖြစ်မှာလို့ SAC-M က သုံးသပ်ပါတယ်။
ကုလသမဂ္ဂမှာ မြန်မာနိုင်ငံကိုယ်စားပြုနိုင်ခွင့်ရရေးအတွက် ပြည်သူထောက်ခံမှုရှိတဲ့ NUG နဲ့ အကြမ်းဖက်စစ်ကောင်စီတို့က အပြိုင်ကြိုးပမ်းနေပြီး ကုလအထွေထွေညီလာခံက ဒီနှစ် ဒီဇင် ဘာလောက်မှာ ဆုံးဖြတ်ချက် ချမှတ်နိုင်ပါတယ်။
အဖွဲ့ဝင် ၉ နိုင်ငံပါဝင်တဲ့ ကုလသမဂ္ဂကိုယ်စားလှယ်စိစစ်ရေးကော်မတီ(Credentials Committee)ဟာ အကြံပြုချက် အစီရင်ခံစာကို အထွေထွေညီလာခံကိုတင်သွင်းမှာဖြစ်ပြီး မြန်မာနိုင်ငံကိုယ်စားပြုမှုကို အဖွဲ့ဝင် ၁၉၃ နိုင်ငံပါဝင်တဲ့အထွေထွေညီလာခံက ဆုံးဖြတ်မှာဖြစ်ပါတယ်။ လိုအပ်ရင် အထွေထွေညီလာခံမှာ မဲခွဲဆုံးဖြတ်မှာဖြစ်ပါတယ်။
အဲဒီမြန်မာကိုယ်စားလှယ်နေရာဟာ အပြည်ပြည်ဆိုင်ရာတရားရုံး(ICJ) အပါအဝင် ကုလသမဂ္ဂရဲ့ ဖိုရမ်အားလုံးမှာ တက်ရောက်ခွင့်ရရေး တနည်းအားဖြင့် ကိုယ်စား လှယ်နေရာကို သက်ရောက်မှုရှိမှာဖြစ်ပါတယ်။