စစ်ကိုင်းတိုင်း ဒီပဲယင်းမြို့နယ်တွင် စစ်တပ်ကဝင်ရောက်ပစ်ခတ်မှုများ ပြုလုပ်နေ၍ ကျေးရွာများမှ ရွာသူ၊ရွာသားထောင်ချီထွက်ပြေးတိမ်းရှောင်နေရကြောင်း သိရသည်။
သြဂုတ်လ ၂၂ရက်နှင့် ယနေ့ ၂၃ ရက်တွင် ဒီပဲယင်းမြို့နယ်ရှိ တည်တောကျေးရွာ၊ ကုန်းကြီးကျေးရွာ၊ ဝဲကြီးကျေးရွာ၊ညောင်လှကျေးရွာ၊ထောင်တန်းရွာ၊ အင်ဘုတ်ရွာ၊ ကြည်ရွာ၊ ယဥ်ကျေးရွာစသည့် ရွာများအား စစ်တပ်မှဝင်ရောက်ပစ်ခတ်ပြီး ရှာဖွေခြင်း၊ ရွာသူရွာသားများပိုင်ဆိုင်သည့် ပစ္စည်းများအားယူဆောင်ခြင်း၊ ဖျက်ဆီးခြင်းများ ပြုလုပ်နေသည်ဟု ရွာခံများက ပြောသည်။
ယဥ်ကျေးရွာ ဘုန်းတော်ကြီးကျောင်းမှ အသက်၁၄နှစ်အရွယ် ကလေးငယ်တစ်ဦးနှင့် မသန်စွမ်းတစ်ဦးကိုလည်း ဖမ်းဆီးသွားကြောင်း ဒေသခံတို့ကပြောသည်။
ယမန်နေ့ကလည်း ဒီပဲယင်းမြို့နယ်အရှေ့ခြမ်းကျေးရွာများ၌ ဝင်ရောက်ရှာဖွေမှုများ ပြုလုပ်ခဲ့ပြီး တန်ဖိုးရှိပစ္စည်းများ ယူဆောင်သွားခဲ့သည်ဟု သိရသည်။
ဒီပဲယင်းမြို့နယ်တွင် သြဂုတ်၇ ရက် ည ၈ နာရီဝန်းကျင်က စစ်ကောင်စီ၏ ကားငါးစီး မိုင်းခွဲတိုက်ခိုက်ခံရပြီးနောက် စစ်ကောင်စီတပ်ဖွဲ့ဝင်များသည် ကျေးရွာများကို ဝင်ရောက် ပစ်ခတ်နေသဖြင့် ကျေးရွာပေါင်း နှစ်ဆယ်ကျော်က လူသောင်းချီထွက်ပြေးတိမ်းရှောင်ခဲ့ရသည်။