ပြီးခဲ့သည့် သြဂုတ် ၁ ရက်မှ ၃၁ ရက်အထိ နိုင်ငံတစ်ဝှမ်း တိုက်ပွဲနှင့် ပဋိပက္ခ ၄၄၃ ခုဖြစ်ပွားခဲ့ရာ စစ်ကောင်စီဘက်မှ ၅၈၀ ဦးသေဆုံးကာ ၁၈၉ ဦး ထိခိုက်ဒဏ် ရာရရှိကြောင်း အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနက ယနေ့ ထုတ်ပြန်သည်။
အဆိုပါ တိုက်ပွဲနှင့် ပဋိပက္ခဖြစ်စဉ်များအတွင်း သေဆုံးပြည်သူ ၇၃ ဦးနှင့် ထိခိက်ဒဏ်ရာရရှိသူ ၄၅ ဦးရှိသည်ဟု ထုတ်ပြန်ချက်က ဆိုသည်။
တိုက်ပွဲနှင့် ပဋိပက္ခ ၄၄၃ ခုတွင် အရပ်သားများအပေါ် အကြမ်းဖက်မှုဖြစ်စဉ် ၁၂၉ ခု ပေါက်ကွဲမှု ၉၄ ခု လက်နက်ကိုင်တိုက်ပွဲ ၈၁ ခု လုပ်ကြံခံရမှု ၇၄ ခု လက်နက်ကိုင်ခုခံမှု ၅၇ ခုနှင့် စစ်ကောင်စီအချင်းချင်းပစ်ခတ်မှု ၈ ခု အသီးသီးပါဝင်ကြောင်း ထုတ်ပြန်ချက်တွင် ဖော်ပြသည်။
နိုင်ငံတတစ်ဝှမ်းဖြစ်ပွားသည့် တိုက်ပွဲနှင့် ပဋိပက္ခဖြစ်စဉ်များအနက် စစ်ကိုင်းတိုင်းတွင် ဖြစ်စဉ် ၁၀၆ ခုဖြင့် အများဆုံးဖြစ်ကာ ရန်ကုန်တိုင်းမှာ ဖြစ်စဉ် ၆၄ ခုဖြင့် ဒုတိယအများဆုံးဖြစ်ပြီး ကချင်ပြည်နယ်မှာ ဖြစ်စဉ် ၄၀ ဖြင့် တတိယ မန္တလေး၊ မကွေးနှင့် ကရင်ပြည်နယ်တို့မှာ ဖြစ်စဉ် ၃၆ ခုစီဖြင့် စတုတ္ထနေရာတွင် ရှိနေသည်။
Public Service Announcement
ဖြစ်စဉ်များဖြစ်ပွားခဲ့သည့် ဒေသများမှာ ရန်ကုန် မန္တလေး မကွေး စစ်ကိုင်း ဧရာဝတီ ပဲခူးစသည့် တိုင်းဒေသကြီးများနှင့် ကရင်၊ကချင် ၊ကယား၊ မွန် ၊ရခိုင် ၊ချင်းနှင့် ရှမ်း စသည့် ပြည်နယ်များ ပါဝင်သည်။
အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာန မဟာဗျူဟာလေ့လာရေးနှင့် ဖက်ဒရယ်တပ်မတော်ရေးရာဦးစီးဌာန သင်တန်းနှင့် သုတေသနဌာနခွဲသည် အထက်ပါ တိုက်ပွဲနှင့် ပဋိပက္ခဖြစ်စဉ်ဆိုင် ရာ အချက်အလက်များကို ပြည်တွင်းသတင်းမီဒီယာ ၃၀ မှ ဖော်ပြသည့် အချက်အလက်များအား ရယူထားခြင်းဖြစ်ပြီး မြေပြင်အချက်အလက်များမှာ ယခုထက်ပိုများနိုင်ကြောင်း အသိပေးထားသည်။
