NUG အစိုးရက ဒီနေ့က စတင်ပြီး အရေးပေါ်အခြေအနေ ကြေညာထားလို့ ပြည်သူလူထုအနေနဲ့ စစ်ရေးသတိဝိရီယနဲ့ နေကြဖို့ KIO ရဲ့ပြောရေးဆိုခွင့်ရှိသူ ဗိုလ်မှူးကြီး နော်ဘူက ပြောလိုက်ပါတယ်။
ကချင်ပြည်နယ်အခြေစိုက် The 74 Media ကို ဗိုလ်မှူးကြီးနော်ဘူက ဖြေကြားထားတာဖြစ်ပြီး KIO ဗဟိုကော်မတီအနေနဲ့တော့ NUG ရဲ့ကြေညာချက်နဲ့ပတ်သက်ပြီး သဘောထားထုတ်ပြန်တာမရှိသေးဘူးလို့ ဆိုထားတာတွေ့ရပါတယ်။
ဒါပေမယ့် ပြည်သူလူထု အနေနဲ့ စစ်ရေးသတိဝိရီယနဲ့နေဖို့ပြောလိုပြီး နေရာတကာမှာ တိုက်ပွဲတွေ ဖြစ်နိုင်ဖွယ်ရှိတယ်လို့ ဗိုလ်မှူးကြီးနော်ဘူ က The 74 Media ဖြေထားပါတယ်။
ဒီနေ့မနက်ပိုင်းက NUG ဟာ စစ်ကောင်စီကို ပြည်သူတွေအနေနဲ့ နိုင်ငံတဝှမ်း လှည်းနေ လှေအောင်း မြင်းဇောင်းမကျန် တော်လှန်ကြဖို့ ကြေညာထားတာပါ။
Public Service Announcement
အဲဒီလိုကြေညာအပြီးမှာပဲ KIO ရဲ့ ဒုတိယ ဥက္ကဋ္ဌ ဒုတိယဗိုလ်ချုပ်ကြီး ဂွမ်မော်ကလည်း သူရဲ့ လူမှုကွန်ရက်မှာ သမ္မာကျမ်းစာပါ အောက်ပါအတိုင်း အဓိပ္ပာယ်ရတဲ့ စာပိုဒ်တစ်ပိုဒ်ကို ကောက်နုတ်ပြီး ရေးတင်ထားခဲ့တာရှိပါတယ်။
“ယောရှုကလည်း၊ သင်တို့သည် ကိုယ်ကိုယ်ကိုယ် သန့်ရှင်းစေကြလော့။ အကြောင်းမူကား၊ နက်ဖြန်နေ့၌ ထာဝရဘုရားသည် အံ့ဘွယ်သော အမှုတို့ကို သင်တို့တွင် ပြုတော်မူမည်ဟု လူများတို့အား မှာထားလေ၏။”
အဲဒီနောက် ဒီနေ့မနက်ပိုင်းမှာတော့ စစ်ကိုင်းတိုင်း ၊ဟုမ္မလင်း မှာ KIA နဲ့ စစ်ကောင်စီတပ်တွေ တိုက်ပွဲပြင်းထန်နေတယ်လို့ သိရပါတယ်။
