စမ်းချောင်းမြို့နယ်ထဲမှာ စက်တင်ဘာ ၉ ရက်က ညနေပိုင်း ပေါက်ကွဲမှုဖြစ်ပြီးတဲ့နောက် ဒီကနေ့ မနက်ထဲက လမ်းတွေပိတ်စစ်ဆေးတာတွေလုပ်နေတယ်လို့ ဂွစျေးအနီးနေထိုင်သူတွေက ပြောပါတယ်။
ဂွစျေးအပြင်ပတ်ပတ်လည်မှာရောင်းချနေတဲ့စျေးသည်တွေအားလုံးကိုရှင်းလိုက်ပြီးတော့ စျေးရုံကြီးပြင်ပမှာ စျေးလုံးဝမရောင်းဖို့ ပြောတဲ့အတွက် စျေးသည်တွေအကုန် သိမ်းပြီးပြန်ကုန်ကြရတယ်လို့ ဒီမနက် ၁၀ နာရီဝန်းကျင်က ဂွစျေးကိုရောက်ခဲ့တဲ့ အိမ်ရှင်မတစ်ဦးက ပြောပါတယ်။
ဂွစျေး စျေးရုံပြင်ပရောင်းတာကို နောက် ၁၀ ရက်အထိ ခွင့်ပြုမှာမဟုတ်လို့ လာမရောင်းကြဖို့ စျေးသည်တွေကို ပြောတယ်လို့လည်း အဲဒီအိမ်ရှင်မက ပြောပါတယ်။
“ဗဟိုလမ်းမကြီးတလျောက်တင်မဟုတ်ဘူး လမ်းသွယ်တွေပါအကုန်စစ်နေတာ အကုန်ပိတ်ထားတယ်။ ဗားဂရာလမ်းမကြီးဟိုဘက် အာရှတော်ဝင်ဘက်ခြမ်းကတော့ပွင့်တယ်။ ဒီဘက်ကတော့ ဝေဠုဝန်အထိကိုအကုန်ပိတ်ထားတာ ကားရော လူရောသွားမရဘူး ” လို့ ဂွစျေးအနီး မကြီးကြီးလမ်းမှာနေထိုင်သူတစ် ဦးက ပြောပါတယ်။
Public Service Announcement
“ဂွစျေးဘက်ကို အသွားမရဘူး။ ဂွစျေးဘက်ကလာတဲ့ကားလည်းမရှိဘူး။ စက်ဘီး၊ ဆိုက်ကား အကုန်စစ် ပြန်လွှတ်။ လမ်းလျောက်တောင်ပေးမသွားတော့ ဗဟိုလမ်းမကြီးပေါ်မှာ သူတို့ပဲ ရှိတယ်” လို့ ဗဟိုလမ်းမကြီးပေါ်နေထိုင်သူ တစ်ဦးက ပြောပါတယ်။
စစ်ကားတစ်စီး မနေ့က ဗုံးနဲ့ပစ်ခတ်ခံရပြီး စစ်ကောင်စီတပ်ဖွဲ့ဝင် ၂ ဦး သေဆုံးသွားတယ်လို့ သတင်းတွေထွက်နေတာရှိပါတယ်။ အဲဒီလိုဗုံးပစ်သွင်းခံရပြီးတဲ့နောက် သေနတ်နဲ့ လိုက်ပစ်တာကြောင့် သေနတ်သံအချက်တော်တော်များများ ကြားခဲ့ရတယ်လို့ ဂွစျေးအနီးနေထိုင်သူတွေက ပြောပါတယ်။
