စမ်းချောင်းမြို့နယ်မှာ စစ်ကောင်စီတပ်ဖွဲ့ဝင်တွေရဲ့ ကား အနီးကပ်တိုက်ခိုက်ခံရပြီးတဲ့နောက် ပိတ်ဆို့ စစ်ဆေးမှုတွေဆက်တိုက်လုပ်နေသလို အဓိကလမ်းမကြီးအချို့ကို တလမ်းမောင်းအဖြစ် သတ်မှတ်လိုက်တဲ့အကြောင်း လိုက်လံကြေညာနေတယ်လို့သိရပါတယ်။
ဗဟိုလမ်း၊ ဗားကရာလမ်းနဲ့၊ ဟံသာဝတီလမ်း ကို တလမ်းမောင်းအဖြစ် သတ်မှတ်လိုက်တာကို ဒီနေ့ ညနေပိုင်း ၃ နာရီလောက်က ကားနဲ့ လိုက်လံကြေညာနေတာလို့စမ်းချောင်းမြို့နယ်အတွင်းမှာနေထိုင်တဲ့အမျိုးသမီးတစ်ဦးကပြောပါတယ်။
ဒါအပြင် စမ်းချောင်းမြို့နယ်က ဗဟိုလမ်းမကြီးပေါ် ၊ ဇေယျဝတီလမ်းတွေမှာ တိုက်ခန်းတွေပေါ်ထိတက်ကာ စစ်ကောင်စီတပ်ဖွဲ့ဝင်တွေဟာ အသည်းအသန် လိုက်လံရှာဖွေစစ်ဆေးတာတွေလုပ်နေတယ်လို့ အဲဒီအနီးပတ်ဝန်းကျင်မှာနေတဲ့သူတွေဆီက သိရပါတယ်။
ရှာဖွေရာမှာ မြေညီထပ်တံခါးဖျက်သံတွေကိုပါကြားရတယ်လို့ ဒေသခံတွေက ပြောကြပါတယ်။
ဒီလို ရှာဖွေမှုတွေ မလုပ်ခင်မှာတော့ ဒီနေ့မနက်ပိုင်းက စမ်းချောင်း ၊ဗဟိုလမ်း ဂွဈေးဘက်အခြမ်းကို ပိတ်ထားလိုက်တာတွေ့ရပါတယ်။
မနေ့က ညနေပိုင်းက စမ်းချောင်းမှာ စစ်ကောင်စီတပ်ဖွဲ့ဝင်တွေရဲ့ ကားတိုက်ခိုက်ခံရမှုမှာတော့ နှစ်ဦးသေဆုံးခဲ့ပြီး တစ်ဦးဟာ ဗိုလ်မှူးအဆင့်ရှိသူဖြစ်တယ်လို့ သတင်းတွေလည်းထွက်နေပါတယ်။