အမေရိကန်ဟာ အာဏာသိမ်းမှုကို ဆန့်ကျင်တဲ့မြန်မာပြည်သူတွေနဲ့အတူ ရပ်တည်ပြီး လက်ရှိလုပ်ဆောင် နေတဲ့လမ်းကြောင်းအတိုင်း ဆက်လက်လုပ်ဆောင်သွားမယ်လို့ ထပ်လောင်းပြောကြားပါတယ်။
အမေရိကန်နိုင်ငံခြားရေးဝန်ကြီးဌာနရဲ့ စက်တင်ဘာ ၉ ရက် သတင်းစာရှင်းလင်းပွဲမှာ သတင်းထောက်တစ်ဦးက အမျိုးသားညီညွတ်ရေးအစိုးရရဲ့ ပြည်သူ့ခုခံတွန်းလှန်စစ်ကြေညာအပြီး အမေရိကန်အနေနဲ့ မြန်မာ့အရေးကို ဘယ် လိုဆက်လက်ကိုင်တွယ်ဖြေရှင်းမလဲလို့ မေးမြန်းခဲ့တဲ့အပေါ် နိုင်ငံခြားရေးဝန်ကြီးဌာနပြောခွင့်ရပုဂ္ဂိုလ်နက်ပရိုက်စ် က ပြောကြာခဲ့တာပါ။
“ကျွန်တော်တို့ အမြဲပြောခဲ့သလို ကျွန်တော်တို့ဟာ မြန်မာပြည်သူတွေနဲ့အတူ ရပ်တည်နေပါတယ်။ မြန်မာပြည်သူ တွေဟာ ဒီအာဏာသိမ်းမှုကို မထောက်ခံဘူးဆိုတာ သူတို့ထပ်ခါထပ်ခါ ဆန္ဒထုတ်ဖော်ခဲ့ပြီးပါပြီ။ နောက်ပြီး အခြေ ခံဥပဒေကိုကျော်လွန်လုပ်ဆောင်တာနဲ့ ဒီမိုကရေစီကိုဆန့်ကျင်တဲ့လှုပ်ရှားမှုတွေကို သူတို့ မထောက်ခံကြပါဘူး။ သူတို့ဟာ ကျွန်တော်တို့လိုပဲ၊ သူတို့အမိမြေမှာ ဒီမိုကရေစီစနစ်ပြန်လည်အသက်သွင်းတာကို မြင်ချင်ကြတယ်”လို့ နက်ပရိုက်စ်က ပြောပါတယ်။
အမေရိကန်ဟာ မြန်မာ့အရေးဖြေရှင်းဖို့ ဘက်ပေါင်းစုံကနေ အနီးကပ်လုပ်ဆောင်နေပြီး အာဆီယံ၊ အင်ဒို-ပစိဖိတ်ဒေသနိုင်ငံတွေအပါအဝင် နိုင်ငံတကာ အသိုင်းအ၀ိုင်းနဲ့အတူ သံတမန်ရေးနည်းလမ်းနဲ့ တိုးတက်မှုရှိအောင် ကြိုးပမ်းနေတယ်လို့ သူက ဆက်ပြောပါတယ်။
Public Service Announcement
နောက်ပြီး အာဏာသိမ်းမှုနဲ့ပတ်သက်ပြီး တာဝန်ရှိသူတွေ၊ ငြိမ်းချမ်းစွာစုဝေးခွင့်နဲ့ ငြိမ်းချမ်းစွာ ဆန္ဒပြခွင့် စတဲ့ အခြေခံ လူ့အခွင့်အရေးတွေကိုကျင့်သုံးခဲ့တဲ့ ပြည်သူတွေအပေါ် အကြမ်းဖက်ကျူးလွန်ခဲ့သူတွေကို ပစ်မှတ်ထားဒဏ်ခတ်အရေးယူမှုတွေလည်း လုပ်ဆောင်ခဲ့တယ်လို့ ဆိုပါတယ်။
အဲဒီလုပ်ဆောင်မှုတွေအတိုင်း အမေရိကန်ပြည်ထောင်စုက ဆက်လက်လုပ်ဆောင်မယ်လို့ နက်ပရိုက်စ်က ပြောပါတယ်။
