ကုလသမဂ္ဂအထွေထွေညီလာခံမှာ စစ်ကောင်စီက မိန့်ခွန်းပြောကြားခွင့်မရရှိဖို့အတွက် အမေရိကန်နဲ့ တရုတ်နိုင်ငံ တို့အကြား သဘောတူညီချက်ရရှိထားပြီးဖြစ်တယ်လို့ သံတမန်တွေကို ကိုးကားပြီး ဝါရှင်တန်အခြေစိုက် ဩဇာကြီး Foreign Policy မဂ္ဂဇင်း က မနေ့က ဖော်ပြပါတယ်။
အဲဒီ အမေရိကန်နဲ့ တရုတ်နိုင်ငံရဲ့သဘောတူညီချက်ဟာ နိုင်ငံတကာရဲ့တရားဝင်ထောက်ခံမှုကို ရရှိဖို့ကြိုး စားနေတဲ့ စစ်ကောင်စီအတွက် ထိုးနှက်ချက်တစ်ခုဖြစ်တယ်လို့ဆိုပါတယ်။
ပြီးခဲ့တဲ့သီတင်းပတ်တွေအတွင်း သံတမန်များအကြားညှိနှိုင်းဆွေးနွေးမှုတွေလုပ် ဆောင်ခဲ့ပြီးနောက်မှာ အာဏာသိမ်းမှုကိုဆန့်ကျင်ကာ ပြီးခဲ့တဲ့အရပ်သားအစိုးရကိုကိုယ်စားပြုတဲ့ သံအမတ်ကြီး ဦးကျော်မိုးထွန်းကို လက်ရှိအတိုင်းဆက်ထားဖို့ဖြစ်လာပါတယ်။
စစ်ကောင်စီကို ကုလအဖွဲ့ဝင်နိုင်ငံအဖြစ် သတ်မှတ်ဖို့ ကြိုးပမ်းမှုဟာ ကြန့်ကြာဖွယ်ရှိနေပြီး အနည်းဆုံးနိုဝင်ဘာ မတိုင်ခင်အထိဖြစ်နိုင်တယ်လို့ Foreign Policyက ဖော်ပြပါတယ်။
Public Service Announcement
အဲဒီအစီအစဉ်ကို ဥရောပသမဂ္ဂ၊ အာဆီယံနဲ့ ရုရှားတို့ကလည်း အလွတ်သဘောထောက်ခံထား တယ်လို့လည်းဆိုပါတယ်။
ကုလသမဂ္ဂအရည်အချင်းစစ်ကော်မတီ(Credentials Committee)အဖွဲ့ဝင် ၉ နိုင်ငံစာရင်းကို အထွေထွေညီလာခံက ဒီနေ့စတင်မယ့် အထွေထွေညီလာခံမှာ ကြေညာဖို့ရှိနေပြီး ကော်မတီ ဥက္ကဌအဖြစ် ဆွီဒင်၊ အဖွဲ့ဝင်နိုင်ငံတွေက ဘူတန်၊ ဘာဟာမား၊ ချီလီ၊ တရုတ်၊ ရုရှား၊ ဆီလီရာလီယွန်၊ တောင်အာဖရိကနဲ့ အမေရိကန်တို့ဖြစ်လိမ့်မယ်လို့ ဆိုပါတယ်။
အထွေထွေညီလာခံဥပဒေတွေအရ ကော်မတီအတွင်း သဘောထားကွဲလွဲမှုရှိခဲ့မယ်ဆိုရင် ကော်မတီနဲ့ အထွေထွေညီလာခံက အတည်မပြုခင်အချိန်အထိ တာဝန်ထမ်းဆောင်ဆဲ ကိုယ်စားလှယ်က သူ့နေရာကို ဆက်လက်ရရှိနေမှာဖြစ်ပါတယ်။
ဆိုလိုတာက ကော်မတီအတွင်း နိုင်ငံတစ်နိုင်ငံက သဘောကွဲလွဲရင် အထွေထွေညီလာခံရဲ့ အတည်ပြုချက်ရယူရမှာဖြစ်ပြီး ဆုံးဖြတ်ချက်မထွက်ပေါ်သေးခင်အထိ လက်ရှိ မြန်မာသံအမတ် ကြီး ဦးကျော်မိုးထွန်းက မြန်မာ နိုင်ငံကိုယ်စားလှယ်အဖြစ် ဆက်ရှိနေမှာဖြစ်ပါတယ်။
Foreign Policy က ဦးကျော်မိုးထွန်းကို ဆက်သွယ်မေးမြန်းရာမှာ မြန်မာရဲ့ကုလထိုင်ခုံအတွက် ဘယ်လိုရှေ့ဆက်သွားမလဲဆိုတာ ဆုံးဖြတ်ဖို့ နိုင်ငံတကာက ဆွေးနွေးညှိနှိုင်းမှုတွေလုပ်ဆောင် နေဆဲဖြစ်ပြီး အထွေထွေညီလာခံမှာ သူကိုယ်တိုင် စကားပြောဖို့ ရှိမှာမဟုတ်ဘူးလို့ ဖြေကြားပါတယ်။
Credentials Committee အတွင်း ဆွေးနွေးမှုရလဒ်ကို စောင့်ဆိုင်းနေတယ်လို့ သံအမတ်ကြီး ဦးကျော်မိုးထွန်းက ဆက်ပြောပါတယ်။
(အမေရိကန်ရောက်မြန်မာများ သံအမတ်ကြီးဦးကျော်မိုးထွန်းအား ထောက်ခံဆန္ဒပြနေစဥ်၊ ဓာတ်ပုံ – CJ)
