တွေ့ဆုံဆွေးနွေးရေးစတင်ဖို့ အာဆီယံအထူးကိုယ်စား လှယ်ကို မြန်မာနိုင်ငံသို့ အမြန်ဆုံးစေလွှတ်ဖို့ အမေရိကန်ကုန်သွယ်ရေးကိုယ်စားလှယ် Katherine Tai က တိုက်တွန်းပြောဆိုလိုက်တယ်လို့ ရိုက်တာသတင်းဌာနက ဖော်ပြပါတယ်။
အမေရိကန်ကုန်သွယ်ရေးကိုယ်စားလှယ်ဟာ ပြီးခဲ့တဲ့တနင်္လာနေ့က အာဆီယံစီးပွားရေးဝန်ကြီး တွေနဲ့ Virtual ကနေတွေ့ဆုံခဲ့ပြီး အာဆီယံအနေနဲ့ သူ့ရဲ့အထူးကိုယ်စားလှယ်ကို မြန်မာနိုင်ငံသို့ အမြန်ဆုံးစေလွှတ်ဖို့တောင်းဆိုခဲ့တာလို့ ကုန်သွယ်ရေးကိုယ်စားလှယ်ရုံးက သတင်းထုတ်ပြန်ပါတယ်။
နိုင်ငံရဲ့စစ်အုပ်ချုပ်ရေးကို ဆန့်ကျင်သူတွေရဲ့ ခုခံတွန်းလှန်စစ်ကြေညာပြီးနောက်မှာ အာဆီယံ အနေနဲ့ တွေ့ဆုံဆွေးနွေးရေးကို တိုးမြှင့်လုပ်ဆောင်ဖို့ အမေရိကန်က တိုက်တွန်းခဲ့တာဖြစ်ပါတယ်။
ကုလသမဂ္ဂအထွေထွေအတွင်းရေးမှူးချုပ်ရဲ့ မြန်မာနိုင်ငံဆိုင်ရာအထူးကိုယ်စားလှယ် Christine Schraner Burgener ကတော့ မြန်မာပြည်သူတွေ အကျိုးအတွက် အားလုံးပါဝင်တဲ့တွေ့ဆုံဆွေးနွေးရေးအတွက် သူ့ရဲ့အကြံပြုချက်တွေကို စစ်တပ်က လိုလားခဲ့ခြင်းမရှိဘူးလို့ မနေ့က ထုတ်ဖော်ပြောဆိုပါတယ်။
Public Service Announcement
အကြမ်းဖက်နည်းလမ်းဟာ မြန်မာစစ်တပ်ရဲ့ ငြိမ်းချမ်းစွာဖြေရှင်းရေး ဆန္ဒကင်းမဲ့မှုကနေ ထွက် ပေါ်လာတာလို့ အထူးကိုယ်စားလှယ်က အရိပ်အမြွတ်ပြောဆိုခဲ့ပါတယ်။
အာဆီယံအထူးကိုယ်စားလှယ်ကို ဩဂုတ်လဆန်းက တည်းက ခန့်အပ်ခဲ့ပြီး တစ်လကျော်ချိန်အထိ မြန်မာ နိုင်ငံကိုလာရောက်နိုင်ခြင်းမရှိသေးပါဘူး။
