စစ်ကောင်စီတပ်၏ လက်ချက်ကြောင့် စက်တင်ဘာ ၁၈ရက်က ထန်တလန်ရှိ နေအိမ်များ မီးလောင်နေစဉ် မီးငြှိမ်းသတ်ရန် သွားရောက်သည့် သင်းအုပ်ဆရာ ပါစတာကျုံးဗျက်ဟုမ်းကို စစ်ကောင်စီတပ်က ပစ်သတ်ခဲ့ သည့်အပြင် သင်းအုပ်ဆရာတော်၏ နာရီ၊ဖုန်းနှင့် မင်္ဂလာရွှေလက်စွပ်ကိုလည်း လက်ချောင်းဖြတ်၍ လုယူသွားကြောင်း ချင်းနှစ်ခြင်းခရစ်ယာန်အဖွဲ့ချုပ်က စက်တင် ဘာ ၁၉ရက်တွင် ထုတ်ပြန်ခဲ့သည်။
အဆိုပါ ထုတ်ပြန်ချက်၌ ပါဝင်သော သင်းအုပ်ဆရာ ပါစတာကျုံးဗျက်ဟုမ်း ၏ လူမဆန်စွာ သတ်ဖြတ်ခံရခြင်း၊ ခရစ်ယာန်ဘုရားရှိခိုးကျောင်း သာသနာ့နယ်မြေများရှိ အဆောက်အဦများ ပျက်စီးစေခြင်း၊ သာသနာ့နယ်မြေများ လုံခြုံမှုမရှိခြင်း၊ ဓမ္မအမှုတော်ဆောင်များ အသင်းသူ အသင်းသားများနှင့် ပြည်သူများအား အသတ်အန္တရာယ် ကျရောက်စေခြင်းများကို သိရှိရသောကြောင့် ထိုသို့သော အပြုအမူများအပေါ် ပြင်းထန်စွာ ကန့်ကွက်ရှုတ်ချ သည်ဟု KBCက ထုတ်ပြန်ခဲ့သည်။
ဖေဖော်ဝါရီလဆန်းမှစ၍ မြန်မာနိုင်ငံ၏ အခြေအနေသည် ပြည်သူများ၏ အနာဂတ်ကို လွန်စွာ စိုးရိမ်မှု ဖြစ်စေကြောင်းနှင့် ပြည်သူလူထုများ၏ ဘ၀ဘေးကင်းလုံခြုံ၊ ငြိမ်းချမ်းစွာ နေထိုင်နိုင်ရေးသည် စစ်မှန်သော အမှန်တရားဘက်မှ ရပ်တည်၍ ပြည်သူများ၏ ဆန္ဒနှင့်သဘောထားများကို အလေးထား ဆောင်ရွက်နိုင်မှသာလျင် ရရှိနိုင်မည်ဖြစ်ကြောင်း သဘောထား ထုတ်ပြန် သည်ဟုလည်း KBCက ဆိုသည်။