ပင်လည်ဘူးမြို့ကို အကြမ်းဖက်စစ်ကောင်စီက လေ ကြောင်းထိုးစစ်ဆင်တိုက်ခိုက်နေ၍ တစ်နိုင်ငံလုံးမှ PDF များ တစ်ပြိုင်နက် စစ်မျက်နှာ ဖွင့်ပေးရန်ပင်လည်ဘူး PDFက ယနေ့တောင်းဆိုလိုက်သည်။
အကြမ်းဖက်စစ်ကောင်စီသည် ပင်လည်ဘူးပါဝင်သည့် ကောလင်းခရိုင်တခုလုံးကို ယနေ့(စက်တင်ဘာ ၂၆) နံနက်ကစ၍ ဖုန်းလိုင်းရော၊ အင်တာနက်လိုင်းပါ ဖြတ်တောက်ပြီး အင်အားထောင်ချီအသုံးပြုကာ ဂျက်လေယာဥ် များနှင့် ထိုးစစ်ဆင်နေသည်ဟု ယနေ့နေ့လယ်ပိုင်းတွင် ပင်လည်ဘူး PDF( Pinlebu People Defence Force – PPDF)က ထုတ်ပြန်ထားသည်။
“မဟာမိတ်တပ်ဖွဲ့များနဲ့ တစ်ပြည်လုံးမှာ ရှိတဲ့ PDF ကာကွယ်ရေးတပ်များကို တောင်းဆိုပါတယ်။ပင်လည်ဘူး မြို့နယ် တစ်ခုလုံး ဖုန်းလိုင်း ၊ အင်တာနက်လိုင်း အကုန်ဖြတ်တောက်ပြီးစကစဖက်က အင်အားထောင်ချီ နဲ့ဂျက်လေယာဥ်များနဲ့ ထိုးစစ်ဆင်ခံနေရပါပြီ။ သတင်းအမှောင်ဖုံးချခံရပြီး ယုတ်မာရက်စက်ခြင်းကို ပြည်သူတွေနဲ့ ကာကွယ်ရေးတပ်သားတွေ အလူးအလဲ ခံရပါတော့မယ်။အင်အားစုဆောင်းပြီး အတန်ကြာပြင်ဆင်ခဲ့သော်လည်း အောက်တန်းကျ ကျင့်ဝတ်မရှိတဲ့ အမျိုးယုတ် စစ်တပ်ရဲ့ စစ်ကျင့်ဝတ်မရှိမှုတွေကြောင့် ၊ ဘယ်သူသေသေ ငတေမာရင်ပြီးရော ဆိုတဲ့ စိတ်ဓာတ်တွေကြောင့် ပြည်သူတွေ ပိုပြီးအထိနာကြရပါတော့မယ်။ကျနော်တို့ရဲ့ ပြည်သူ့ရင်သွေးတွေ ကျဆုံးရပါလိမ့်မယ်။
သည်အခြေအနေမှာ တစ်နိုင်ငံလုံးက PDF တွေ အနေနဲ့ ကိုယ့်ရပ်ကိုယ့်ရွာကနေ ထကြွပြီး စစ်မျက်နှာ ဖွင့်ပေးကြပါတော့လို့ တောင်းဆိုပါတယ်ဗျာ။သည့်ထက် ပိုပြီး အသေအပျောက်မများခင် ၊ မထိခိုက်ခင် သက်သာရာရကြောင်း ဖြစ်နိုင်အောင် အနယ်နယ်အရပ်ရပ်ကနေ စတင်ထိုးစစ်ဆင်ပေးဖို့ အနူးအညွတ်မေတ္တာရပ်ခံပါတယ်” ဟု တောင်းဆိုထားသည်။
“အခုလို အချိန်မှာမှ နယ်အနှံ့က ရုန်းမထရင် တစ်နယ်ချင်းကို စကစက ကောက်စားနေပါလိမ့်မယ်။တစ်ပြည်လုံးက အုံကြွမှသာ တော်လှန်ရေးက အောင်မြင်မှာပါ” ဟု PPDFက ထုတ်ပြန်ထားသည်။
ပင်လယ်ဘူးမြို့နယ်တွင် စက်တင်ဘာလ နောက်ဆုံးပါတ်တွင် ဖြစ်ပွားသောတိုက်ပွဲများကြောင့် စစ်ကောင်စီတပ် ၄၀ ကျော် သေဆုံးပြီး လက်နက်ခဲယမ်းများစွာကို
ဒေသခံကာကွယ်ရေးတပ်များ ကသိမ်းဆည်းနိုင်ခဲ့သည်။
စစ်ကောင်စီတပ်က အထိ့နာသဖြင့် ပင်လယ်ဘူးမြို့ပေါ်တွင်ပါ စက်တင်ဘာ ၂၅ ရက်က လေယာဥ်ဖြင့်ဗုံးကျဲခဲ့သည်။ ထို့အပြင် ယနေ့ နံနက်မှစ၍ ပင်လယ်ဘူး၊ ကောလင်း ၊ဝန်းသိုမြို့နယ် အကြမ်းဖက်စစ်ကောင်စီက အင်တာနက်နှင့် ဖုန်းလိုင်းဖြတ်တောက်ထားသည်။