အာဏာသိမ်းစစ်ကောင်စီ၏ ပြန်ကြားရေးဒုတိယဝန်ကြီးနှင့် ပြန်ကြားရေးတာဝန်ခံ ဇော်မင်းထွန်းကို ဇော်မဲလုံးဟု
မခေါ်ဘဲ အမည်မှန်ခေါ်ရန် စစ်ကောင်စီ၏တိုင်းနှင့်ပြည်နယ်အဆင့်အရာရှိများက အောက်ခြေမှဝန်ထမ်းများကို လစဉ်ပုံမှန်အစည်းအဝေးတွင်ပြောကြားကြောင်း ဝန် ထမ်းအချို့က ပြောသည်။
“ဇော်မင်းထွန်းကို ဇော်မဲလုံးဟုမခေါ်ဖို့ ညွှန်မှုးကအစည်း အဝေးမှာ ထည့်ပြောသွားတယ်”ဟု အောက်တိုဘာ၁ရက်က ပြုလုပ်သည့် လစဉ်ပုံမှန်အစည်းအဝေးတွင် တိုင်းအဆင့် ညွှန်ကြားရေးမှူးတစ်ဦးကပြောခဲ့သည်ဟု ယင်းအစည်း အဝေးတက်ခဲ့သည့် ဝန်ထမ်းတစ်ဦးက ပြောသည်။
စစ်ကောင်စီ၏ ပြန်ကြားရေးတာဝန်ခံဇော်မင်းထွန်းသည် ဒီချုပ်အစိုးရလက်ထက်က ကာကွယ်ရေးဝန်ကြီးဌာနနှင့်တပ်မတော်၏ ပြောရေးဆိုခွင့်ရှိသူတာဝန်ယူခဲ့စဉ် သတင်းစာရှင်းလင်းပွဲအချို့၌ အဂ်လိပ်ဘာသာစကားကြားညှပ်သုံး၍ပြောရာ အစီအစဉ်မကျ၍ လူအများ၏ ပျက်ရယ်ပြုမှုကို ခံခဲ့ရသည်။ ထို့နောက် ရွေးကောက်ပွဲကြို ၊ ရွေးကောက်ပွဲနှင့်ရွေးကောက်ပွဲလွန်ကာလများတွင် အရပ်သားအစိုးရနှင့်အနိုင်ရပါတီအပေါ်အမြဲနှောက်ယှက် ပေး ၊ခြိမ်းခြောက်ခဲ့သော စစ်တပ်အပေါ် ပြည်သူအများစုက သဘောမကျတော့ဘဲ စစ်တပ်ကိုယ်စားဝါဒဖြန့်သော ဇော်မင်းထွန်းကိုလည်း ဇော်မဲလုံးဟုသာ နာမည်ပြောင်ခေါ်ရာမှ လူထုအကြားတွင် ထိုနာမည်ကိုသာအခေါ်များနေခြင်းဖြစ်သည်။
ယခုအခါ စစ်ကောင်စီ၏သတင်းစာရှင်းလင်းပွဲများတွင် NUGအား စိန်ခေါ်စကားပြောခြင်း၊ ဒီမိုကရေစီနှင့် လူ့အခွင့်အရေး ၊ဖက်ဒရယ်ပြည်ထောင်စုအတွက် စစ်ကျွန်ဘဝမှ လွတ်မြောက်အောင်ကြိုးစားနေသောလူငယ်များကို အထင်အမြင်သေးစွာဖြင့် ၊မှားယွင်းကောက်ချက်ချပြောဆိုခြင်းများမကြာခဏပြုလုပ်သောကြောင့် ရယ် စရာကောင်းသည့် လူပျက်တစ်ဦးကဲ့သို့ပြည်သူ လူထုကြား သိမှတ်ထားကြသည်။
ဌာနဆိုင်ရာဝန်ထမ်းများကြားတွင်လည်း ဇော်မဲလုံးဟုသာ အမည်တွင်နေခြင်းဖြစ်သည်။
“ပြည့်တန်ဆာကအပျိုစစ်တယ်ဆိုရင်တောင် ယုံပေးလို့ရတယ်။ ဇော်မဲလုံးကပြောရင် ပင်လယ်ထဲမှာရေရှိတယ်ဆိုရင်တောင် ပြေးကြည့်ပြီးမှယုံမယ်။ သတင်းစာရှင်းလင်း ပွဲကလဲ ဈေးထဲကငါးစိမ်းသယ်တွေရန်ဖြစ်နေတာလောက်တောင် အဆင့်မရှိဘူး။ ဘာတဲ့ NUGအစိုးရကိုသတ္တိရှိရှိထွက်ပါဆိုတော့ မင်းတို့ကသတ္တိရှိရှိရောဖြေရှင်းရဲလို့လား” ဟု စစ်ကောင်စီသတင်းစာရှင်းလင်းပွဲသတင်းထုတ်ပြန်မှုအောက်တွင် လူမှုကွန်ရက် သုံးစွဲသူတစ်ဦးက မှတ်ချက်ပြုထားသည်။