ငါန်းဇွန်မြို့နယ်မှ စစ်​ကောင်စီသတင်း​ပေးဟုဆို​​​သောဆရာ၊ ဆရာမလင်မယား အသတ်ခံရ

မန္တလေးတိုင်း မြင်းခြံခရိုင် ငါန်းဇွန်မြို့နယ်တွင် စစ်ကောင်စီသတင်းပေး ကျောင်းဆရာ၊ ဆရာမလင်မယားနှစ်ဦးအား သုတ်သင်ရှင်းလင်းခဲ့ကြောင်း မြင်းခြံနှလုံးလှလူမိုက်ကြီးများအဖွဲ့က အသိပေးသည်။

အောက်တိုဘာ ၃ ရက် ည ၈နာရီခွဲအချိန်ခန့်က ငါန်းဇွန်မြို့နယ်၊ မြေတိုင်းကျေးရွာမှ ကျောင်းဆရာ အာနိုး(ခေါ်) သီဟနှင့် ကျောင်းဆရာမ မြသန်းဋ္ဌေးတို့လင်မယားသည် ငါန်းဇွန်မြို့နယ်အတွင်းရှိ ပြည်သူလူထု၏ တော်လှန်ရေးလုပ်ဆောင်ချက်များကို စစ်ကောင်စီများထံ အမြဲတမ်း သတင်းပေးနေသည်ဟု တိကျမှန်ကန်စွာကြားသိ၍ မြင်းခြံ နှလုံးလှလူမိုက်ကြီးများအဖွဲ့၊ မြင်းမှုလျှပ်စီးအဖွဲ့၊MGN TIGERအဖွဲ့ ညီနောင်မဟာမိတ်သုံးဖော် ပေါင်းပြီး သုတ်သင်ရှင်းလင်းခဲ့ကြောင်း မြင်းခြံနှလုံးလှလူမိုက်ကြီးများအဖွဲ့က ယနေ့(အောက်တိုဘာ ၅ ရက်)တွင်အသိပေးသည်။

သတင်းပေးလင်မယားနှစ်ဦး အသတ်ခံရပြီးနောက် အောက်တိုဘာ ၄ ရက်တွင် စစ်ကောင်စီတပ်များရောက်ရှိလာပြီး ရွာတွင်းအကြမ်းဖက်ပစ်ခတ်မှုများ ပြုလုပ်နေ၍ ရှောင်တိမ်းခဲ့ရကြောင်း ဒေသခံများက ပြောသည်။

ယနေ့(အောက်တိုဘာ ၅ရက်)နံနက် ၂ နာရီဝန်းကျင်ကလည်း ငါန်းဇွန်မြို့နယ်အတွင်းရှိ ရေလယ်သောင်အုပ်စုသို့ စစ်ကောင်စီတပ်များဝင်စီးခဲ့ပြီး ရွာသူ၊ရွာသားများ ထွက် ပြေးတိမ်းရှောင်နေရသည်ဟု ဒေသခံများက ပြောသည်။

Public Service Announcement

မြင်းခြံနှလုံးလှလူမိုက်ကြီးများအဖွဲ့နှင့် ပူးပေါင်းအဖွဲ့များသည် မြင်းခြံနယ်အပြင် စစ်ကိုင်းတိုင်း မြောင်နှင့်မြင်းမူနယ်၊ မကွေးတိုင်းရေစကြိုနယ်များတွင်ပါ စစ်ကောင်စီလက်အောက်ခံများအား သုတ်သင်ရှင်းလင်းမှုများ ပြုလုပ်နေကြသည်။