ကချင်ပြည်နယ် မိုးညှင်းမြို့နယ် အင်းတော်ကြီးဒေသရှိ ကချင်လက်နက်ကိုင်အဖွဲ့(KIA) ရှေ့တန်းနယ်မြေသို့ စစ်ကောင်စီတပ်က ယနေ့ တိုက်လေယာဉ်ဖြင့် ဗုံးကြဲတိုက် ခိုက်ခဲ့သည်ဟု KIA သတင်းနှင့် ပြန်ကြားရေးဌာန တာဝန်ခံဗိုလ်မှူးကြီးနော်ဘူက အတည်ပြုသည်။
“ဒီနေ့ နေ့လည်ပိုင်း ၁၁နာရီကျော် အချိန်လောက်မှာ ကျွန်တော်တို့ KIA တပ်ရင်း(၂၆) ရှေ့တန်းနယ်မြေဖြစ်နေတဲ့ အင်းတော်ကြီးဘက်မှာ စစ်ကောင်စီဘက်က ဂျက်လေယာဉ်နဲ့ လာပြီးတော့မှ ဗုံးကြဲတိုက်ခိုက်တာရှိပါတယ်”ဟု ၎င်းက ပြောသည်။
အဆိုပါ တိုက်ခိုက်မှုကြောင့် မည်မျှထိခိုက်မှုရှိသည်ဆိုသော အသေးစိတ်အခြေအနေကို မသိရသေးကြောင်းနှင့် KIAဘက်က တုံ့ပြန်ပစ်ခတ်မှု လုပ်ဆောင်ခြင်းမရှိခဲ့ကြောင်း ဗိုလ်မှူးကြီးနော်ဘူက ပြောသည်။ စစ်ကောင်စီတပ်အနေဖြင့် တိုက်ပွဲ၌ ၎င်းတို့ တပ်များ အထိနာပါက လေကြောင်းမှ တိုက်ခိုက်လေ့ရှိရာ ယခုလေကြောင်း တိုက်ခိုက်မှုသည် တနိုင်းဘက်၌ ဖြစ်ပွားနေသည့် တိုက်ပွဲများနှင့် သက်ဆိုင်ခြင်းရှိ၊မရှိ မသိသေးဟု ၎င်းကဆိုသည်။
“အခုတလောကတော့ ရသတ္တပတ်အတွင်းမှာတော့ လီဒိုလမ်းဘက်မှာ နေ့တိုင်းလိုလို ခြုံခိုတိုက်ပွဲတွေ မိုင်းဆွဲတဲ့ တိုက်ပွဲတွေရှိတယ်။ အဲဒီဘက်မှာများ သူတို့ထိခိုက်တာများတာလားပေါ့”ဟု ဗိုလ်မှူးကြီးနော်ဘူက ပြောသည်။
Public Service Announcement
တနိုင်းမြို့နယ်နှင့် လီဒိုလမ်းမတစ်လျှောက်တွင် စက်တင်ဘာလမှစ၍ စစ်ရေးလှုပ်ရှားမှုများ လုပ်ဆောင်လာသည့် စစ်ကောင်စီတပ်ကို KIAက ခုခံတိုက်ခိုက်မှုများ လုပ်ဆောင်နေ၍ နေ့စဉ်နီးပါး တိုက်ပွဲဖြစ်ပွားခဲ့သည်။
