ဟားခါးနှင့်ဖလမ်းကြားတွင် တိုက်ပွဲပြင်းထန်​နေ

ချင်းပြည်နယ်မြို့တော်ဟားခါးနှင့် ဖလမ်းမြို့ကြားတွင်အကြမ်းဖက်စစ်​ကောင်စီတပ်နှင့် ချင်းပြည်နယ် ဒေသခံကာကွယ်ရေးတပ်များကြား ယ​နေ့မှစ၍ တိုက်ပွဲပြင်းထန်စွာဖြစ်ပွားနေ​ကြောင်း ဒေသခံများကပြောသည်။

ချင်းပြည်နယ်အတွင်း အင်အားဖြည့်တင်းလာသည့် အကြမ်းဖက်စစ်ကောင်စီ တပ်သားများကို ချင်းအမျိုးသားတပ်ဦး(CNA)နှင့်ချင်း​ဒေသကာကွယ်​ရေးတပ်ဖွဲ့ (CDF) ကဆီးကြိုတိုက်ခိုက်ခြင်းဖြစ်သည်ဟု ဒေသခံများကပြောသည်။

ဖလမ်းမြို့နယ်ထဲမှ ကျေးရွာ လေးရွာမှ ဒေသခံများလည်း ဘေးလွတ်ရာထွက်ပြေးနေရ​ကြောင်း ​ဒေသခံအချို့က​ပြောသည်။ အကြမ်းဖက်စစ်ကောင်စီက လက်နက်ကြီးများဖြင့် ဒေသခံ ကာကွယ်ရေးတပ်ဖွဲ့များကို ပစ်ခတ်နေသည်ဟု ဒေသခံများကပြောသည်။

ချင်းအမျိုးသားတပ်ဦး(CNA)က အကြမ်းဖက်စစ်ကောင်စီတပ်သည် ပြည်သူများနှင့် ခရီးသွားကားများကို လူသားဒိုင်းအဖြစ် အသုံးပြု​နေသဖြင့် ဖလမ်း-ရိဒ်နှင့် ဖလမ်း-ဟားခါးလမ်းကို သေရေရှင်ရေးအပ အသုံးမပြုရန် သတိပေးပြီးနောက် ယခုလို တိုက်ပွဲဖြစ်ပွားနေခြင်းဖြစ်သည်။ အကြမ်းဖက်စစ်တပ်က စစ်ကား ၆ စီးနှင့်တင့်ကား ၁ စီးကို ပြည်နယ်မြို့တော် ဟားခါးကို အင်အားဖြည့်တင်းလာစဉ် ဒေသခံကာကွယ်ရေးတပ်များက ယခုလိုကြားဖြတ်တိုက်ခိုက်ခြင်းဖြစ်သည်။

Public Service Announcement