ရွှေပြည်သာက စစ်ကောင်စီသတင်းပေး ရာအိမ်မှူး ပစ်သတ်ခံရ

ရန်ကုန်မြို့ ရွှေပြည်သာမြို့နယ် ၅/၁ရပ်ကွက်ရှိ အကြမ်းဖက် စစ်ကောင်စီ သတင်းပေး ရာအိမ်မှူးထွန်းထွန်း ယနေ့ (အောက်တိုဘာ၁၃)ညနေ ၃ နာရီခွဲခန့်တွင် သေနတ်ဖြင့် ပစ်ခံရပြီး သေဆုံးသွားကြောင်း အဆိုပါရပ်ကွက်နေပြည်သူများက ပြောသည်။

“ရာအိမ်မှူး ထွန်းထွန်းက သူ့အိမ်ရှေ့မှာ ရှိနေတုန်း လူ နှစ် ယောက်လာပစ်သွားတာပါ။ ခေါင်းနဲ့ ဗိုက်တွေ ထိသွားတာ တွေ့ရပါတယ်။ နေရာမှာတင် ပွဲချင်းပြီး သေသွားပါတယ်။ ဘယ်အဖွဲ့က လာပစ်တယ်ဆိုတာတော့ မသိပါဘူး။ သူက ဆန္ဒပြတဲ့ကလေးတွေ နေတဲ့နေရာတွေကို စစ်ကောင်စီကို သတင်းပေးလုပ်နေတယ် လို့ ရပ်ကွက်မှာနာမည်ကြီးပါတယ် “ဟု ရွှေပြည်သာမြို့နယ်နေ ပြည်သူတစ်ဦးက ပြောသည်။

ပစ်ခတ်မှု ဖြစ်ပွားပြီးနောက် ရပ်ကွက်အတွင်း အကြမ်းဖက်စစ်ကောင်စီတပ်ဖွဲ့ဝင်များ ရောက်ရှိလာပြီး စစ်ဆေးမှုများ ပြုလုပ်နေကြောင်း ဒေသခံများက ဆိုသည်။