နွေဦးတော်လှန်ရေးကာလအတွင်း ကျဆုံးခဲ့ရသော သူရဲကောင်းများအား ရန်ကုန်မြို့ရှိ အမေရိကန်သံရုံး ဒုတိယ အကြီးအကဲ ဒက်ဘ်လင်းက ကျောက်တုံးများဖြင့် ဂုဏ်ပြုကြောင်း ယနေ့(အောက်တိုဘာ၁၈ရက်)တွင် အသိပေးထုတ်ပြန်ထားသည်။
အဆိုပါသံရုံးဒုတိယအကြီးအကဲသည် အသစ်ရောက်ရှိလာသောသူဖြစ်ကြောင်း အမေရိကန်သံရုံးက ဆိုသည်။
“အသစ်ရောက်ရှိလာသည့် သံရုံးဒုတိယအကြီးအကဲ ဒက်ဘ်လင်း သည်မြန်မာနိုင်ငံ၌ ကျဆုံးခဲ့ရသော သူရဲကောင်းများအား မကြာသေးခင်က ဂုဏ်ပြုခဲ့ပါသည်။ အမေရိကန်သံရုံးရှိ ကျဆုံးသူများအမှတ်တရ အထိမ်းအမှတ်သည် စစ်အာဏာသိမ်းမှုကြောင့် အသက်သေဆုံးခဲ့ကြရသူများအား ဂုဏ်ပြုထားခြင်းဖြစ်ပါသည်။ ယင်းအမှတ်တရအထိမ်းအမှတ်နေရာတွင် ယနေ့အထိကျောက်တုံးပေါင်း ၁၃၀၀ ကျော်ရှိနေပြီဖြစ်ပြီး ကျောက်တုံးတစ်တုံးစီသည် ကျဆုံးခဲ့ရသူတစ်ဦးချင်းစီကို ကိုယ်စားပြုပါသည်။”ဟု အမေရိကန်သံရုံးက ထုတ်ပြန်သည်။
စစ်အာဏာရှင်တော်လှန်ရေး (နွေဦးတော်လှန်ရေး) ကာလအတွင်း ကျဆုံးခဲ့ရသူ စုစုပေါင်းမှာ အောက်တိုဘာ ၁၆ရက်အထိ ၁,၁၇၈ ဦး ရှိခဲ့ပြီဖြစ်ကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP)က ယမန်နေ့တွင် ထုတ်ပြန်ထားသည်။
Public Service Announcement
