တောင်ငူမြို့တွင် စစ်ကောင်စီသတင်းပေးဟုဆိုသောပြည်ခိုင်ဖြိုးပါတီဝင် အမတ်လောင်း ယနေ့(အောက်တိုဘာ၁၈) သေနတ်ဖြင့်ပစ်သတ်ခံလိုက်ရသည်။
၂၀၂၀ ရွေးကောက်ပွဲတွင် ဝင်ပြိုင်ခဲ့သည့် ပြည်ခိုင်ဖြိုးပါတီဝင် အမတ်လောင်းဦးမောင်မောင်စိုးကို တောင်ငူမြို့ပန်းစွယ်တော်ဟိုတယ်အနီးတွင် လူအချို့ကသေနတ်ဖြင့် ပစ်သတ်သွားခြင်းဟု ဒေသခံများကပြောသည်။
“ဒီနေ့(အောက်တိုဘာ ၁၈)မနက် ၇နာရီလောက်က ပစ်သွားတာ။ သေနတ်နဲ့ပစ်သွားလို့ သေတယ်ပဲ ကြားရတယ်။ ကျန်တာ မသိဘူး”ဟု ဒေသခံတစ်ဦးက ပြောသည်။
ဦးမောင်မောင်စိုးသည် တောင်ငူမြို့တွင် စစ်ကောင်စီသတင်းပေးအဖြစ် နာမည်ကြီးပြီး PDFများ၏ သတင်းကို စစ်ကောင်စီထံ ပို့ပေးနေသူဖြစ်ကြောင်း ဒေသခံများကပြောသည်။
Public Service Announcement
” စစ်တပ်က ပြည်သူလူထုအပေါ် ဘယ်လောက်ယုတ်မာသလဲဆိုတာ ထမင်းစားတဲ့ လူတိုင်းသိတယ်။ ပြည်သူကိုသတ်ဖို့ ဒလန်လုပ်နေရင်တော့ အခုလို သေမှာပဲ။ ကျွန်မတို့ စိတ်မကောင်း မဖြစ်ဘူး”ဟု ဒေသခံတစ်ဦးက သူ၏ အမြင်ကိုပြောသည်။
အာဏာသိမ်းစစ်ကောင်စီသတင်းပေးသော ပြည်ခိုင်ဖြိုး ပါတီဝင်များ နိုင်ငံတစ်ဝန်းမကြာခဏ အသတ်ခံရပြီး အသတ်ခံရသူများတွင် ၂၀၂၀ ရွေးကောက်ပွဲဝင်ရောက်ယှဥ်ပြိုင်ပြီး ရှုံနိမ့်ခဲ့သောအမတ်အချို့လည်းပါဝင်လာသည်ကို တွေ့ရသည်။
