စစ်ကိုင်းတိုင်း မုံရွာမြို့နယ်တွင် စစ်ကောင်စီသတင်းပေးအမျိုးသားတစ်ဦး သတ်ဖြတ်ခံရကြောင်း ဒေသခံများက ပြောသည်။
ယနေ့ (အောက်တိုဘာလ ၂၁ ရက်) နံနက်ပိုင်းက မုံရွာမြို့နယ် ကြေးမုံကျေးရွာတွင်နေထိုင်သော စစ်ကောင်စီသတင်းပေးကျော်ဆန်းဦးဆိုသူအား PDF-South Monywaနှင့် Monywa Heroes Groupတို့ပူးပေါင်းပြီး ရှင်းလင်းလိုက်ကြောင်း အဆိုပါအဖွဲ့များက အသိပေးသည်။
မုံရွာမြို့နယ်နှင့် မြန်မာပြည်ဒေသအသီးသီးရှိ စစ်ကောင်စီသတင်းပေးများ ဓမ္မဘက်သို့အချိန်မီကူးပြောင်းရန်နှင့် တိုင်းပြည်နှင့်ပြည်သူ လုံခြုံအေးချမ်းရေးအတွက် လုပ်စရာရှိသည်များကို ပြတ်ပြတ်သားသား လုပ်ဆောင်သွားမည်ဟု PDF-South Monywaက သတိပေးထားသည်။
မုံရွာအခြေစိုက် PDFစခန်းအချို့ စစ်ကောင်စီဝင်ရောက်ဖျက်ဆီးမှုသတင်းများလည်း ထွက်ပေါ်နေပြီး PDF-South Monywaကမူ အဆိုပါသတင်းများနှင့်ပတ်သက်၍ လက်တလောသတင်းထုတ်ပြန်နိုင်ခြင်းမရှိသေးကြောင်း ဖြေကြားသည်။
ယနေ့ နံနက်ပိုင်းက အရာတော်မြို့နယ်ရှိ PDFစခန်းတစ်ခု အကြမ်းဖက်စစ်ကောင်စီတပ်များဝင်ရောက်ခဲ့သည့်အခြေအနေကြောင့် မုံရွာ-အရာတော်လမ်းအား ဖြတ်သန်းသွားလာခြင်းမပြုရန် မုံရွာအခြေစိုက် ပြည်သူ့ကာကွယ်ရေးအဖွဲ့များက မေတ္တာရပ်ခံထားသည်။