ရန်ကုန်မြို့ (၄၇)လမ်းနှင့် (၄၈)လမ်းကြား မဟာဗန္ဓုလလမ်းပေါ် မှ Urban Asia အဆောက်အအုံရှိ ကမ္ဘောဇဘဏ်ခွဲတွင် ယနေ့နေ့လည်ပိုင်းက ဓားပြတိုက်ခံသည်။
မျက်နှာဖုံးစွပ်ထားသူငါးဦးထက်မနည်းက ဘဏ်အတွင်းဝင်ရောက်ကာ ဓားပြတိုက်မှုကျူးလွန်ခဲ့ခြင်းဖြစ်ပြီး ဖြစ်စဉ်ကြောင့် ကျပ်သိန်း ၃၀၀၀ ခန့်ပါသွားကြောင်း ကျောက်တံတားမြို့နယ်မှ တာဝန်ရှိသူတစ်ဦးက ပြောသည်။ ဓါးပြတိုက်ခံရသောဘဏ်သည် ဗိုလ်တထောင်မြို့နယ်ရဲစခန်းအနီးတွင်ရှိသဖြင့် နေခင်းကြောင်တောင် မြို့လယ် တွင် ရဲစခန်းအနီးရှိဘဏ်ကိုဓါးပြတိုက်ခြင်းအပေါ် ပြည်သူများက အံသြပြီးထင်မြင်ချက်အမျိုးမျိုးပေးနေကြသည်။
ဗိုလ်တထောင်မြို့နယ်နေ ပြည်သူတစ်ဦးကလည်း”ဓားပြတိုက်ခံရတယ် ဆိုတာ ဟုတ်တယ်။ လူတစ်စု လာတိုက်တယ်လို့ပဲ လတ်တလော သိရတယ်။ ဝန်ထမ်းတွေရဲ့ ဖုန်းတွေသိမ်းပြီး ဘဏ်တံခါးကို ပိတ်ပြီး တိုက်သွားတယ်လို့တော့ ကြားတယ်။ တစ်ဦးတစ်ယောက်မှတော့ ထိခိုက်ဒဏ်ရာ ရတဲ့ပုံ မတွေ့ရဘူး။ ငွေဘယ်လောက်ပါသွားတယ် ဆိုတာလည်း သေချာတော့ မသိရသေးပါဘူး ” ဟု ပြောသည်။
အဆိုပါ ဓားမြ တိုက်ခံရမှု ဖြစ်ပွားပြီးနောက် အာဏာ သိမ်းစစ်ကောင်စီတပ်ဖွဲ့ဝင်များက ဘဏ်အနီးလမ်းတစ်ခြမ်းပိတ်၍ စစ်ဆေးမှုများ ပြုလုပ်နေကြောင်း ဒေသခံအချို့က ပြောသည်။ထို့အပြင် စစ်ကောင်စီတပ်ဖွဲ့ဝင်များသည် ဗန္ဓုလတံတားပေါ်နှင့် တံတားအဆင်း ၌လည်း လက်နက်အပြည့်အစုံဖြင့် ကားလမ်းကိုပိတ်၍ စစ်ဆေးနေကြောင်း ပြည်သူအချို့က ပြောသည်။
Public Service Announcement
ဖေဖော်ဝါရီ ၁ စစ်တပ်မှအာဏာသိမ်းပြီးနောက်ပိုင်း ဘဏ်ဓားပြတိုက်မှုများ လေးကြိမ်ထက်မနည်းဖြစ်ပွားခဲ့ရာ ကျောက်မဲမြို့ရှိ ကမ္ဘောဇဘဏ်ခွဲလည်းပါဝင်ခဲ့ပြီး ယခုအကြိမ်နှင့်ဆိုလျှင် ကမ္ဘောဇဘဏ်ခွဲများဓားပြတိုက်ခံရမှု နှစ်ကြိမ်ရှိပြီ ဖြစ်သည်။
