မြန်မာနိုင်ငံရဲ့ စစ်ကောင်စီဆန့်ကျင်ရေးလှုပ်ရှားမှုဟာ အချိန်တိုအတွင်းပြီးဆုံးသွားမှာမဟုတ်ဘဲ ပြည်တွင်းလက်နက်ကိုင်ပဋိပက္ခဆီနက်နက်ရှိုင်းရှိုင်းဦးတည်နေတာကို စိုးရိမ်မိတယ်လို့ ကုလသမဂ္ဂအတွင်းရေးမှူးချုပ်ရဲ့မြန်မာနိုင်ငံဆိုင်ရာအထူးကိုယ်စားလှယ်က အောက်တိုဘာ ၂၁ ရက်မှာ ပြောပါတယ်။
နယူးယောက်ရှိ ကုလသမဂ္ဂကနေပြုလုပ်တဲ့ အထူးကိုယ်စားလှယ်ရဲ့သတင်းစာရှင်းလင်းပွဲမှာ နိုင်ငံအနှံ့ အပြားက အကြမ်းဖက်မှုတွေနဲ့ စစ်တပ်ဆန့်ကျင်ရေးလှုပ်ရှားမှုဟာ လက်နက်ကိုင်သည် အထိ အရှိန်မြင့်တက်လာတာကို Christine Schraner Burgener က ထည့်သွင်း ပြောကြားပါတယ်။
“ပြည်သူတွေက စစ်တပ်ကို လက်မခံပါဘူး။ ပြည်သူတွေက အရှုံးပေးမှာမဟုတ်ဘဲ ဆက်လက် ခုခံပါလိမ့်မယ်။ သူတို့ဟာ လုပ်ငန်းခွင်ကိုလည်း မပြန်ပါဘူး။ သူတို့ဟာ အကြမ်းဖက်မှုတွေကို ဆက်လက်အသုံးပြုပါလိမ့်မယ်”လို့ အထူးကိုယ်စားလှယ် Schraner Burgener က ပြောပါတယ်။
အထူးကိုယ်စားလှယ်ဟာ မြန်မာစစ်တပ်က ဆန့်ကျင်သူတွေအပေါ် ရက်စက်တဲ့ဖိနှိပ်မှုတွေကို သာမက ပြည်တွင်းနေရပ်စွန့်ခွာသူအရေအတွက်မြင့်တက်လာတာ၊ ဘဏ်နဲ့ ကျန်းမာရေးကုသမှု စနစ်တွေ ပြိုလဲမှုတွေကိုလည်း ရှင်းလင်းပွဲမှာ ပြောပါတယ်။
Public Service Announcement
နောက်ပြီး နိုင်ငံတကာအသိုင်းအဝန်းအနေနဲ့ စစ်တပ်အုပ်ချုပ်သူတွေကို လက်ခံတဲ့သဘောသက် ရောက်တဲ့ အချက်ပြမှုတွေ မလုပ်ဆောင်ဖို့ အရေးကြီးတယ်လို့ Schraner Burgenerက သတိပေးပါတယ်။
ကုလသမဂ္ဂလုံခြုံရေးကောင်စီအနေနဲ့ အခုထိနှောင့်နှေးနေတဲ့ အရေးယူမှုကို အရေးပေါ်လုပ်ဆောင်ဖို့လိုအပ်ကြောင်းလည်း အထူးကိုယ်စားလှယ်က ထောက်ပြပါတယ်။
ဆွစ်ဇာလန်သံတမန် Schraner Burgener ဟာ ကုလသမဂ္ဂအထွေထွေအတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးကိုယ်စားလှယ်အဖြစ် ၂၀၁၈ ဧပြီမှာ စတင်တာဝန်ထမ်းဆောင်ခဲ့ပြီး မကြာခင်မှာ တာဝန်ပြီးဆုံးမှာဖြစ်ပါတယ်။
