မြန်မာ့နွေဦးတော်လှန်ရေး ရန်ပုံငွေ အတွက်ပြုလုပ်သည့် တစ်ကိုယ်တော်ပွဲများမှ အလှူငွေ ဒေါ်လာ ၆၃၀၀၀၀ ကျော်ရရှိခဲ့ကြောင်း အဆိုတော် ဆောင်းဦးလှိုင်၏ ဖေ့စ်ဘွတ်ခ်၌ ရေးသားထားသည်။
ဆောင်းဦးရဲ့နွေဦးတော်လှန်ရေးရံပုံငွေရှာဖွေပွဲ အမည်ဖြင့် တစ်ကိုယ်တော်ဖျော်ဖြေပွဲများကို ဩဂုတ်လကုန်ပိုင်းမှစတင်၍ အမေရိကန်နိုင်ငံရှိ မြို့များတွင် လှည့်လည်ဖျော်ဖြေခဲ့ခြင်းဖြစ်သည်။
နောက်ဆုံးပွဲကို အောက်တိုဘာ ၂၃ ရက်က Dallas,Texas ၌ ပြုလုပ်ခဲ့ပြီး ပွဲဆယ်ပွဲအနက် ရန်ပုံငွေ အများဆုံးရရှိခဲ့သည်ဟု ဆိုသည်။
ဖျော်ဖြေပွဲများမှ ရရှိသည့် လက်မှတ်ခများအပါအဝင် အမှတ်တရပစ္စည်းများရောင်းချခြင်းနှင့် ပရိသတ်များက ချီးမြှင့်သည့်ဆုကြေးများအားလုံးကို လှူဒါန်းခြင်း ဖြစ်ကြောင်း ပွဲတစ်ပွဲခြင်း၏ အလှူငွေရရှိမှုစာရင်းများကို ဆောင်းဦးလှိုင်ကရေးသားထားသည်။
အဆိုပါဖျော်ဖြေပွဲများအပြင် ပွဲလုပ်ရန် ကမ်းလှမ်းမှူများရှိသော်လည်း အမေရိကန်နိုင်ငံ၏ ဆောင်းတွင်းဒဏ်ကို မခံစားနိူင်သောကြောင့် ဆောင်းရာသီပြီးဆုံးချိန်မှသာ ပြန်လည်၍ ဖျော်ဖြေပွဲများပြုလုပ်မည်ဟု ဆောင်းဦးလှိုင်ကရေးသားထားသည်။