ယမန်နေ့ နံနက်ပိုင်းကတည်းက မီးလောင်ကျွမ်းခဲ့သည့် ချင်းပြည်နယ် ထန်တလန်မြို့ မီးလောင်မှု ယနေ့(အောက်တိုဘာ၃၀)နံနက် ၉နာရီခန့်တွင် မီးငြိမ်းပြီဖြစ်ကြောင်းနှင့် မီးခိုးငွေ့များသာရှိတော့ကြောင်း ချင်းဒေသခံတစ်ဦးက ပြောကြားသည်။
အာဏာသိမ်းစစ်ကောင်စီတပ်က လက်နက်ကြီးများပစ်ခတ်ခြင်းကြောင့် ထန်တလန်မြို့တွင် အောက်တိုဘာ ၂၉ရက် နံနက် ၁၀နာရီကျော်အချိန်မှ ယနေ့ နံနက် ၉နာရီကျောအထိ ၂၄နာရီနီးပါးကြာ မီးလောင်ကျွမ်းခဲ့ခြင်းဖြစ်သည်။
မီးလောင်သည့် နေအိမ်စာရင်းကို ထန်တလန်ချင်းပြည်ကာကွယ်ရေးတပ်ဖွဲ့(CDF) တပ်ဖွဲ့ဝင်များက စာရင်းကောက်ယူခဲ့ကြောင်း ဒေသခံက ပြောသည်။
“နောက်ဆုံးအခြေအနေက အိမ်မီးလောင်တဲ့ဟာတွေကို CDF ထန်တလန်အနေနဲ့အိမ်ဘယ်လောက် ဘယ်လောက် လောင်တယ်ဆိုတာ သူတို့ရေတွက်နေတယ်။ အခု ၉နာရီခွဲလောက် မီးငြိမ်းသက်သွားပြီ။ အခိုးအငွေ့တွေပဲရှိတော့တယ်။ အခုက CDF ထန်တလန်ရဲ့ စာရင်းအရတော့ အိမ် ၁၆၃ လောင်သွား တယ်။ အဲဒီအထဲမှာ ဘုရားကျောင်း ၂ခု ပါသွားတယ်။ ရပ်ကွက် ၅ခုလောင်သွားတာ” ဟု ချင်းဒေသခံက ပြောသည်။
Public Service Announcement
စစ်ကောင်စီတပ်အနေဖြင့် စက်တင်ဘာလ တတိယပတ်အတွင်းကလည်း ထန်တလန်မြို့ပေါ်သို့ လက်နက်ကြီးများပစ်ခတ်ခဲ့၍ နေအိမ် ၂၀ခန့်မီးလောင်ခဲ့သည်။ မီးငြှိမ်းသတ်ရန်လာသည့် ဘာသာရေးသင်းအုပ်ဆရာတော်တစ်ပါးကိုလည်း စစ်ကောင်စီတပ်ဖွဲ့ဝင်များက ပစ်ခတ်သတ်ဖြတ်ခဲ့၍ သေဆုံးခဲ့ကြောင်း ချင်းနှစ်ခြင်းခရစ်ယာန်အဖွဲ့ချုပ်က ထုတ်ပြန်ထားသည်။
အဆိုပါ ဖြစ်စဉ်အပြီးတွင် လူဦးရေ တစ်သောင်းခန့်ရှိသည့် ထန်တလန်မြို့ခံ အားလုံးနီးပါး စစ်ဘေးတိမ်း ရှောင်သွားကြောင်း၊ ယမန်နေ့မီးလောင်မှုတွင် မီးငြှိမ်းသက်မည့်သူမရှိ၍ မီးလောင်သည့် နေအိမ်အရေအတွက် ပိုများသွားခြင်းဖြစ်သည်ဟု ဆိုသည်။
ဓာတ်ပုံ – ထန်တလန် CDF
