ချင်းပြည်နယ် မင်းတပ်မြို့ပေါ် သို့ ကင်းလှည့်လာသည့် အကြမ်းဖက်စစ်ကောင်စီတပ်ကို ချုံခိုတိုက်ခိုက်ခဲ့ရာ စစ်ကောင်စီတပ်သားသုံးဦးသေဆုံးပြီး ရှစ်ဦးဒဏ်ရာရရှိခဲ့သည်ဟု CDF-MINDATက ယနေ့(နိုဝင်ဘာ၁) နံနက်အစောပိုင်းတွင် ထုတ်ပြန်သည်။
ဖြစ်စဥ်မှာမူ အောက်တိုဘာ ၃၁ ရက်က မင်းတပ်မြို့ စိချဲ့လမ်းဆုံအနီးတွင် ကင်းလှည့်လာသော စစ်ကောင်စီတပ်များကို ချုံခိုတိုက်ခိုက်ခဲ့ရာမှ တိုက်ပွဲချိန် မိနစ်၃၀ခန့်ကြာမြင့်ခဲ့ပြီး CDF-MINDAT မှ အနည်းငယ် ဒဏ်ရာရသူတစ်ဦးရှိကာ အောင်မြင်စွာပြန်ဆုတ်ခွာနိုင်ခဲ့သည်ဟု အသိပေးသည်။
“စကစဘက်က သုံးဦး မုန့်ဟင်းခါးဆိုတာတော့ သေချာတယ်။နောက်ရှစ်ဦးကလည်း ဒဏ်ရာတော်တော် ပြင်းပြင်းရသွားတာ”ဟု CDF-MINDATမှ တာဝန်ရှိသူကပြောသည်။
ယင်းတိုက်ပွဲသည် အကြမ်းဖက်စစ်ကောင်စီတပ်သည် ထန်တလန်မြို့ရှိ လူနေအိမ်များနှင့် ဘာသာရေးအဆောက်အဦများကို မီးရှို့ဖျက်ဆီးခဲ့သည့်အတွက် လက်တုံ့ပြန်ခြင်းဟု CDF- MINDATက ဆိုသည်။
Public Service Announcement
အာဏာသိမ်းစစ်ကောင်စီက အောက်တိုဘာအတွင်း ချင်းပြည်နယ်ရှိ မြို့နယ်ငါးခုမှ အိမ်ခြေ ၃၀၀ကျော်မီးရှို့ဖျက်ဆီးခဲ့သည်။
ထိုလုပ်ရပ်များတွင် အကြမ်းဖက်စစ်ကောင်စီသည် ဂျနီဗာ ကွန်ဗန်းရှင်းသဘောတူညီချက်ကို လိုက်နာမှုမရှိဘဲ စစ်ရာဇဝတ်ကျူးလွန်ခြင်းဖြစ်၍ အကြမ်းဖက်စစ်ကောင်စီကို အမြစ်ပြတ်တိုက်ခိုက်ချေမှုန်းသွားမည်ဟု ချင်းပြည်နယ်အတွင်းရှိ ဒေသခံကာကွယ်ရေးတပ်ဖွဲ့ ၁၆ ဖွဲ့နှင့် ချင်းအမျိုးသားတပ်ဦးတို့က အောက်တိုဘာ ၃၁ ရက်တွင် ပူးတွဲကြေညာထားသည်။
