သန်လျင်မြို့တွင် ယနေ့(နိုဝင်ဘာ ၃)မွန်းလွဲပိုင်းက ယာဉ်ထိန်းရဲသုံးဦးကို မြို့ပြပျောက်ကျားတပ်က သုတ် သင်လိုက်ကြောင်း သတင်းရရှိသည်။
ပျောက်ကျားတပ်ဖွဲ့၏ပစ်မှတ်ထား ပစ်ခတ်ခံရသည့်ယာဉ်ထိန်းရဲသုံးဦးသည် သန်လျင်မြို့ သီလဝါစက်မှုဇုံသွား အောင်သပြေမီးပွိုင့်လမ်းဆုံးအနီးတွင် ပစ်ခတ်ခံရခြင်းဖြစ်ကြောင်း သန်လျင်လူငယ် မြို့ပြပျောက်ကျားတပ်ဖွဲ့(TYPDF)၏ ထုတ်ပြန်ချက်တွင် ဖော်ပြသည်။
အဆိုပါယာဉ်ထိန်းရဲများမှာ အောင်သပြေမီးပွိုင့်အနီး နေ့စဉ်နီးပါး ကား၊ ဆိုင်ကယ်စသည့်ယာဉ်များကို မတရားဖမ်းဆီး စစ်ဆေးခြင်းများပြုလုပ်သည့်အပြင် ငွေကြေးတောင်းယူမှုများကိုပါ ကျူးလွန်လျက်ရှိသည်ဟု သန်လျင်ဒေသခံတစ်ဦးက ဆိုသည်။
ပစ်ခတ်မှုဖြစ်ပွားသည့် အောင်သပြေလမ်းဆုံးမီးပွိုင့်၌ ယာဉ်ထိန်းရဲများက ဆိုင်ကယ်များအား ဖမ်းဆီးစစ်ဆေးမှုများပြုလုပ်ခဲ့ပြီး ငွေကြေးတောင်းယူမှုများကို အခင်းမဖြစ်ပွားမီအချိန်ထိ ကျူးလွန်ခဲ့သည်ဟု ယင်းဒေသခံက ဆက်ပြောသည်။
သန်လျင်လူငယ်မြို့ပြပျောက်ကျားတပ်ဖွဲ့က စစ်ကောင်စီထောက်တိုင်များအား သုတ်သင်ရှင်းလင်းလျက်ရှိရာ ယနေ့နံနက်ပိုင်းကလည်း သတင်းပေးဒလန်ဆိုသူတစ်ဦးကို ပစ်ခတ်ခဲ့သေးသည်။