ဘားအံမြို့က ရပ်ကွက်တွေအတွင်းမှာ ညတိုင်းလိုလို စစ်ကောင်စီတပ်တွေက မော်တော်ယာဉ်နဲ့ လိုက်လံရှာဖွေဖမ်းဆီးတာတွေ လုပ်ဆောင်နေပြီး CDM လုပ်နေသူအပါအဝင် လူအချို့ကို ဖမ်းဆီးရမိလို့ ပုဒ်မတပ်ပြီး အမှုဖွင့်ရုံးထုတ်စစ်ဆေးနေတာတွေရှိနေတယ်လို့ စစ်ကောင်စီနဲ့ နီးစပ်သူတွေက ပြောပါတယ်။
” ဖမ်းမိတာတွေရှိတယ်။ ပုဒ်မ ၅၀၅ ရှိတယ်။ စီဒီအမ်တွေလည်း ဖမ်းမိတယ်။ အကြမ်းဖက်ဥပဒေပုဒ်မလည်း ရှိတယ်။ တစ်နေ့ တစ်ယောက် နှစ်ယောက် သုံးယောက်အဲ့လိုမျိုး” စစ်ကောင်စီနဲ့ နီးစပ်သူတွေက ပြောပါတယ်။
ဒါ့အပြင် ပြီးခဲ့တဲ့ အောက်တိုဘာလကုန်ပိုင်းလောက်က ဘားအံမြို့ပေါ်မှာ ဖမ်းဆီးရမိတဲ့ လူငယ်အချို့ကို ပုဒ်မ ၅၀၅ နဲ့ အမှုဖွင့်အရေးယူ ရုံးထုတ်ဆောင်ရွက်လျက်ရှိနေတယ်လို့ သိရပါသေးတယ်။
ဘားအံမြို့နယ်အတွင်းမှာ လူစုလူဝေးမပြုလုပ်ဖို့ ပုဒ်မ ၁၄၄ အမိန့်က ဆက်လက်တည်ရှိနေပြီး ညမထွက်ရ အမိန့်ကိုတော့ ည ၁၀ နာရီကနေ မနက် ၄ နာရီအထိ စစ်ကောင်စီက ပြောင်းလဲပြင်ဆင်သတ်မှတ်ထားရှိလိုက်တာပါ။
Public Service Announcement
လာမယ့် နိုဝင်ဘာ ၇ ရက်မှာ ကျရောက်မယ့် ကရင်ပြည်နယ်နေ့ပွဲတော်နီးကပ်လာချိန်မှာ စစ်ကောင်စီတပ်ဖွဲ့က မြို့တွင်းမှာ ရှာဖွေဖမ်းဆီးစစ်ဆေးတာတွေက ပုံမှန်လိုလိုရှိနေတာဖြစ်ပါတယ်။
ဒါ့အပြင် ဘားအံမြို့အဝင်အထွက်နေရာတွေအားလုံးသာမက မြို့တွင်းနေရာတွေမှာလည်း ဖြတ်သန်းသွားလာနေတဲ့ ကားဆိုင်ကယ်တွေကို စစ်ကောင်စီတပ်ဖွဲ့တွေက တားဆီးကာ ရှာဖွေစစ်ဆေးတာတွေလည်း နေ့စဉ် လုပ်ဆောင်နေတာဖြစ်တယ်လို့ မြို့ခံတွေရဲ့ ပြောကြားချက်အရ သိရပါတယ်။
