ရန်ကုန်မြို့ လှိုင်မြို့နယ် ကျောင်းကုန်းဈေးအနီးတွင်ယနေ့(နိုဝင်ဘာ ၁၀)ညနေ ၄ နာရီခွဲခန့်က စစ်ကောင်စီလက်ပါးစေသုံးဦးကို သုတ်သင်ရှင်းလင်းခဲ့ကြောင်း လှိုင် PDF နှင့် နီးစပ်သူတစ်ဦးက ပြောသည်။
အခင်းဖြစ်ပွားသည့် ကျောင်းကုန်းဈေးမှာ လှိုင်မြို့နယ် (၇) ရပ်ကွက်နှင့် (၁၃)ရပ်ကွက်ကြား ဓမ္မသုခလမ်းထိပ်တွင်တည်ရှိပြီး စစ်ကောင်စီတပ်သားအချို့ အရပ်ဝတ်ဖြင့် ဈေးလာဝယ်သည်ကို စောင့်စိုင်းပစ်ခတ်ခဲ့ခြင်းဖြစ်သည်ဟု ၎င်းက ဆိုသည်။
“ဈေးဝယ်လမ်းလျောက်ထွက်တာ အရပ်ဝတ်နဲ့ အဲတာကို ရှင်းတာပါ”ဟု လှိုင် PDF နှင့် နီးစပ်သူက ပြောသည်။
အထက်ပါပစ်ခတ်မှုဖြစ်ပွားပြီး ၁ နာရီခန့်အကြာတွင် စစ်ကောင်စီတပ်သားအချို့ ကျောင်းကုန်းဈေးအနီးရောက်ရှိလာပြီး ပစ်ခတ်မှုများလုပ်ဆောင်စဉ် အရပ်သားလူငယ်တစ်ဦး ကျည်ထိမှန်သေဆုံးကာ တစ်ဦး ထိခိုက်ဒဏ်ရာရခဲ့သည်ဟု မျက်မြင်တွေ့ရှိသူတစ်ဦးကို ကိုးကားပြီး Hlaing Information က ဖော်ပြသည်။
Public Service Announcement
ထို့အပြင် ဈေးတည်ရှိရာ ဓမ္မသုခကျောင်းလမ်းသို့ စစ်ကား ၆ စီးခန့်ရောက်ရှိနေပြီး လမ်းပိတ်ဆို့စစ်ဆေးမှုများ လုပ်ဆောင်လျက်ရှိကြောင်း သိရသည်။
