ဒေါ်အောင်ဆန်းစုကြည်ကို စစ်ကောင်စီက အဂတိမှုနဲ့ စွပ်စွဲထားတဲ့အမှုကို ဒီနေ့ နိုဝင်ဘာ ၁၂ ရက်က နပြည်တော်မှာစစ်ဆေးရာ ဦးဖြိုးမင်းသိန်းရဲ့ဇနီးဒေါ်ခင်မိမိကြွယ်က တရားလို သက်သေအဖြစ် လာရောက်ထွက်ဆိုသွားခဲ့ပါတယ်။
သူ့အမျိုးသားရဲ့ တောင်းဆိုချက်အရ ရွှေချောင်းတွေနဲ့ အမေရိကန်ဒေါ်လာတွေကို စီစဉ်ပေးခဲ့ရတယ်လို့ ဒေါ်ခင်မိမိကြွယ်ကထွက်ဆိုပါတယ်။
ဒါပေမယ့် ဒီလို စီစဉ်ပေးတဲ့ ရက် အတိအကျ ကိုတော့ မထွက်ဆိုခဲ့ဘူးလို့သိရပါတယ်။
ဒါအပြင် ဦးဖြိုးမင်းသိန်း ဒေါ်အောင်ဆန်းစုကြည်ထံသွားရောက်တဲ့နေ့ကိုလည်း ထွက်ဆိုတာမရှိဘူး လို့သိရပါတယ်။
Public Service Announcement
ဒေါ်အောင်ဆန်းစုကြည်ထံကို ဦးဖြိုးမင်းသိန်းနဲ့အတူ လိုက်ပါသွားတာမရှိဘူးလို့ ဒေါ်ခင်မိမိကြွယ်က ထွက်ဆိုပါတယ်။
ဝန်ကြီးချုပ် ဦးဖြိုးမင်းသိန်းဟာ ဒေါ်အောင်ဆန်းစုကြည်ကို ရွှေ နဲ့ ဒေါ်လာတွေ ပေးခဲ့ရတယ်လို့ ပြောထားတဲ့ ရုပ်သံဖိုင်ကို စစ်ကောင်စီရဲ့ ဝါဒဖြန့်ရုပ်သံက ထုတ်လွှင့်ဖူးပါတယ်။
ဒါအပြင် တရားခွင်မှာ လာရောက်ထွက်ဆိုရာမှာလည်း အဲဒီရုပ်သံဖိုင်ထဲကအတိုင်းထွက်ဆိုခဲ့တယ်လို့သိရပါတယ်။
ဒီနေ့ လာရောက်ထွက်ဆိုတဲ့ ဒေါ်ခင်မိမိကြွယ်ဟာ အရင် ရုံးချိန်းတွေတုန်းက နေမကောင်းတဲ့အတွက် လာရောက်ထွက်ဆိုခဲ့တာမရှိပါဘူး။
ဒေါ်အောင်ဆန်းစုကြည်ကတော့သူအပေါ်စွပ်စွဲချက်တွေဟာ အခြေအမြစ်မရှိဘူးလို့ သူရဲ့ရှေ့နေတွေကို ပြောပြခဲ့ဖူးပါတယ်။
