အရှေ့တောင်တိုင်းစစ်ဌာနချုပ်တိုင်းမှူးခရီးစဉ်ရဲ့ လမ်းလုံခြုံရေးအတွက်ဆိုပြီး ကော့ကရိတ်မြို့အနီးက ကျေးရွာတွေအချို့မှာ စစ်ကောင်စီတပ်တွေ ဝင်ရောက်နေရာယူထားတယ်လို့ ဒေသခံတွေရဲ့ ပြောကြားချက်အရ သိရပါတယ်။
ရတခတိုင်းမှူး ဗိုလ်ချုပ်ကိုကိုမောင်ရဲ့ မြဝတီခရီးစဉ်လုံခြုံရေးအတွက်ဆိုပြီး စစ်ကောင်စီတပ်ဖွဲ့တွေဟာ ဒီကနေ့မနက်ပိုင်း ကော့ကရိတ်မြို့ အာရှလမ်းအနီးက ကော့နွဲ့၊ ရွာသစ်နဲ့ ကမိုင်ကုန်းရွာဝန်းကျင်ဘက်မှာ ရောက်ရှိနေရာယူထားတာကြောင့် တိုက်ပွဲတွေပြန်ဖြစ်ပွားမှာကို ဒေသခံတွေက စိုးရိမ်နေကြပြီး တချို့တွေက ရှောင်နေကြတယ်လို့ ဒေသခံတစ်ဦးက ပြောပါတယ်။
“စစ်သားတွေ ပြန်ပြီးလှုပ်ရှားနေတာတွေ ရှိပါတယ်။ ဒီမနက်ပဲ အင်အားတွေနဲ့ တွေ့ရတယ်။ ကော့နွဲ့နဲ့ မနီးမဝေးမှာတစ်ဖွဲ့၊ ရွာသစ်မှာလည်းတက်တယ် တစ်ဖွဲ့ အင်အား ၂၀ လောက်။ ကမိုင်ကုန်းဘက်မှာလည်း တက်တယ်လို့ကြားရတယ်။ သူတို့တွေ အသင့်အနေအထားရှိနေတယ်။ ရွာသစ်ဘက်ခြမ်းမှာ ကောက်ရိတ်တဲ့ လူတွေလည်း တချို့မနေရဲတော့ဘူး။ ရှောင်သွားကြတယ်။ ရွာသားတွေအများစုက တိုက်ပွဲတွေဖြစ်မှာကိုလည်း စိုးရိမ်နေရတယ်” လို့ ဒေသခံတစ်ဦးက ပြောပါတယ်။
စစ်ကောင်စီတပ်ဖွဲ့တွေဟာ တိုင်းမှူးခရီးစဉ်ရဲ့ လမ်းကြောင်းလုံခြုံရေးရယူဖို့အတွက် မနေ့ညကတည်းက နယ်မြေခံ KNLA တပ်ဖွဲ့ထံမှာ သတင်းကြိုတင်ပေးပို့ထားပြီဖြစ်တယ်လို့ ဒေသတွင်း လုံခြုံရေးတာဝန်ရှိသူတစ်ဦးက ပြောပါတယ်။
Public Service Announcement
“စစ်ကောင်စီတပ်တွေ လမ်းဂိတ်တောက်လျှောက် ချထားတယ်။ သူတို့တိုင်းမှူးတက်လာလို့လေ။ သူတို့တွေ နည်းနည်းစီ သွားသွားလာလာလုပ်နေတယ်။ ရွာတွေထဲထိ သူတို့မဝင်ဘူး။ ဘယ်လိုပြောရမလဲ သူတို့နေတာ အာရှလမ်းနဲ့ မနီးမဝေးမှာပေါ့နော်။ သူတို့တွေ လူကြီးလမ်းကြောင်းရှိလို့ဆိုပြီး ညကတည်းက ခွင့်ထောင်းထားတာ။ ကြိုအသိပေးထားပြီးပြီ” လို့ ဒေသတွင်းလုံခြုံရေးတာဝန်ရှိသူတစ်ဦးက ဆိုပါတယ်။
ကော့ကရိတ်မြို့ အာရှလမ်းမအနီး ကော့နွဲ့၊ ရွာသစ်၊ ကမိုင်ကုန်းစတဲ့ ကျေးရွာတွေမှာ ပြီးခဲ့တဲ့လက ကရင်အမျိုးလွတ်မြောက်ရေးတပ်မတော် KNLA နဲ့ စစ်ကောင်စီတပ်တို့ကြား တိုက်ပွဲတွေဖြစ်ပွားခဲ့ပြီး ဒေသခံပြည်သူထောင်ချီခန့် စစ်ဘေးတိမ်းရှောင်နေခဲ့ရသေးတာဖြစ်ပါတယ်။
ပြီးခဲ့တဲ့ အောက်တိုဘာ ၁ ရက်ကလည်း ကော့ကရိတ်မြို့အနီး အာရှလမ်းမနား ကော့ကရိတ်-ကျိုက်ဒုံလမ်းဆုံမှာ ရတခတိုင်းမှူးရဲ့ လမ်းကြောင်းလုံခြုံရေးယူထားတဲ့ စစ်ကောင်စီတပ်ဖွဲ့တွေကို ခွဲထွက်ဒီကေဘီအေအဖွဲ့က ကြားဖြတ်တိုက်ခိုက်ခဲ့လို့ စစ်ကောင်စီတပ်ဖွဲ့ဝင် လေးဦးသေဆုံးခဲ့ပြီး တစ်ဦး ထိခိုက်ဒဏ်ရာရရှိသွားခဲ့တာ ဖြစ်ပါတယ်။
