အကြမ်းဖက်စစ်တပ်အာဏာသိမ်းထားသည့် ပြီးခဲ့သည့် အောက်တိုဘာတွင် နိုင်ငံခြားရင်းနှီးမြှပ်နှံမှု ကန်ဒေါ်လာ ၁၅ သန်းဖိုးခန့်ဝင်ရောက်ခဲ့သည်ဟု အကြမ်းဖက်စစ်တပ်ထိန်းချုပ်ထားသည့် ရင်းနှီးမြှပ်နှံမှုကော်မရှင်က ထုတ်ပြန်သောစာရင်းများတွင် ဖော်ပြထားသည်။
ထိုပမာဏသည် NLDအစိုးရလက်ထက် ၂၀၂၀ အောက်တိုဘာတွင် ဝင်ရောက်ခဲ့သည့် နိုင်ငံခြားရင်းနှီးမြှပ်နှံမှု ကန်ဒေါ်လာ ၁၁၈သန်းခန့်နှင့် နှိုင်းယှဉ်ပါက ရှစ်ဆကျော်လျော့နည်းခဲ့ခြင်းဖြစ်သည်။
အကြမ်းဖက်စစ်တပ်၏ ရင်းနှီးမြှပ်နှံမှုကော်မရှင် ထုတ်ပြန်ရာတွင် အောက်တိုဘာတွင် နိုင်ငံခြားရင်းနှီးမြှပ်နှံမှု လေးခုဝင်ရောက်ခဲ့ပြီး ၎င်းတို့အနက် ကုန်ထုတ်လုပ်မူလုပ်ငန်း သုံးခုနှင့် စွမ်းအင်ထုတ်လုပ်ရေးဆိုင်ရာစီမံကိန်း တစ်ခု အပါအဝင် စုစုပေါင်းလေးခုဖြစ်သည်။
ကာလတူဖြစ်သည့် အရပ်သားအစိုးရလက်ထက် ၂၀၂၀ အောက်တိုဘာတွင် နိုင်ငံခြားရင်းနှီးမြှပ်နှံမှု ၇ ခုဝင်ရောက်ခဲ့သည်။
Public Service Announcement
ထိုအတူအကြမ်းဖက်စစ်တပ်က နိုင်ငံတော်အာဏာကို အတင်းအဓမ္မလုယူထားသည့် ၂၀၂၀-၂၁ ဘဏ္ဍာနှစ်တွင် နိုင်ငံခြားရင်းနှီးမြှပ်နှံမှု ဒေါ်လာ ၃ ဒသမ ၇ ဘီလီယံဖိုးဝင်ရောက်ခဲ့သည်ဟု ထုတ်ပြန်ထားသည်။
သို့သော်လည်း ထိုပမာဏသည့် အမှန်တကယ်ဝင်ရောက်ခဲ့သော လုပ်ငန်းများမရှိဘဲ ယခင်လုပ်ငန်းများကို ပြန်လည်ထည့်သွင်းထားခြင်းဖြစ်နိုင်သည်ဟု လုပ်ငန်းရှင်တချို့က ပြောသည်။
“ဒီကာလမှ ဘယ်လိုလုပ်ငန်းမျိုးမှ လုပ်ငန်းအသစ် ထပ်ဝင်တာ မလုပ်နိုင်ဘူး။ ဖြစ်နိုင်တာ အရင်အာဏာမသိမ်းခင်က တင်ပြထားတဲ့လုပ်ငန်းတွေကို သူတို့ဖာသာခွင့်ပြုပြီး စာရင်းတွေတင်နိုင်တာဖြစ်မယ်”ဟု ရင်းနှီးမြှပ်နှံမူဆိုင်ရာအကြံပေးကုမ္ပဏီတစ်ခုမှ အရာရှိတစ်ဦးကပြောသည်။
အမှန်တကယ်လုပ်ကိုင်မည့် လုပ်ငန်းများမဖြစ်နိုင်ကြောင်း၎င်းက ဆိုသည်။
မြန်မာနိုင်ငံတွင် နှစ်စဉ် နိုင်ငံခြားရင်းနှီးမြှပ်နှံမှု ဒေါ်လာ၄ ဘီလီယံမှ ၆ဘီလီယံကြားဝင်ရောက်နေခြင်းဖြစ်သည်။ သို့သော်လည်း စစ်တပ်က နိုင်ငံတော်အာဏာကို လုယူပြီးနောက် နိုင်ငံခြားရင်းနှီးမြှပ်နှံမှုများ တရှိန်ထိုးကျဆင်းလာခြင်းဖြစ်သည်။
(ယနေ့တွင် မန္တလေးမြို့၌ စစ်အာဏာရှင်ဖြုတ်ချရေး LGBTသပိတ်စစ်ကြောင်း ချီတက်ဆန္ဒပြနေစဥ်၊ ဓာတ်ပုံ – GSCB)
