ကျွန်းလှအနောက်ခြမ်း ဖုန်းလိုင်းများဖြတ်တောက်ကာ လေကြောင်းပစ်ခတ်နေ
ကောလင်း၊ကန့်ဘလူ၊ ကျွန်းလှသုံးမြို့နယ်နယ်စပ်ရှိ ကောလင်းမြို့နယ် အောင်ချမ်းသာရွာကို ယနေ့နံနက်ပိုင်းတွင် စစ်ကောင်စီတပ်က ထပ်မံမီးရှို့ဖျက်ဆီးနေပြီး ကျေးရွာလေးရွာမှပြည်သူထောင်ချီ ထွက်ပြေးတိမ်းရှောင်နေရကြောင်း ဒေသခံများက ပြောသည်။
သြဂုတ်လ၂၃ရက်နံနက်ပိုင်းကစစ်ကိုင်းတိုင်း ကန့်ဘလူ၊ကောလင်း၊ကျွန်းလှမြို့နယ် အစပ်၌ဖြစ်ပွားခဲ့သော တိုက်ပွဲတွင်စစ်ကောင်စီတပ် ၄၀ ကျော်သေဆုံးပြီး စစ်တပ်အရာရှိ ၃ ဦးအဖမ်းခံရကာ လက်နက်ခဲယမ်း ၂၀ ကျော်ကို PDF များကသိမ်းဆည်းနိုင်ခဲ့သည်။
ထိုသို့အထိနာပြီးနောက်အကြမ်းဖက်စစ်တပ်သည် တိုက်ပွဲဖြစ်ပွားရာအနီးရှိ အောင်ချမ်းသာရွာကို ယမန်နေ့ သြဂုတ်လ ၂၄ ရက်နေ့ နံနက်ပိုင်းကပထမအကြိမ်မီးရှို့ခဲ့သည်။
ယနေ့ သြဂုတ်လ ၂၅ ရက်နေ့ နံနက် ၇နာရီကျော်ခန့်ကလည်း အောင်ချမ်းသာရွာကို အကြမ်းဖက်စစ်တပ်က ဒုတိယအကြိမ် မီးရှို့နေကြောင်း ကျွန်းလှတက်ကြွလှုပ်ရှားသူများအဖွဲ့က အသိပေးသည်။
Public Service Announcement
“မြေပြင်အခက်အခဲကြောင့် ဆုံးရှုံးမှု မသိရသေးခင်၊ယခု ဒုတိယအကြိမ် မီးရှို့ဖျက်ဆီးခြင်းပါဗျ။နောက်ထပ် စစ်
ကြောင်းတစ်ကြောင်းက ပေတပင်ရွာဘက် ဦးတည်နေတယ်လို့ ကနေဦးမြေပြင်သတင်းရပါတယ်။အဲ့ဒီဘက်မှာစစ်
ကြောင်းထိုးလာတာကြောင့် အောင်ချမ်းသာ၊ရွာသစ်၊လက်ခုပ်ပင်နှင့် ပေတပင်ရွာ(၄)ရွာမှ ပြည်သူတွေ အိုးအိမ်စွန့်ခွါပြီး တိမ်းရှောင်နေရပါတယ်ဗျ။”ဟု ကျွန်းလှတက်ကြွလှုပ်ရှားသူများအဖွဲ့က အသိပေးသည်။
အကြမ်းဖက်စစ်တပ်သည် သြဂုတ်လ၂၃ရက်နေ့ညက လေကြောင်းတိုက်ခိုက်ပြီးနောက် ကျွန်းလှမြို့နယ်အတွင်း ဆက်သွယ်ရေးလိုင်းများ ဖြတ်တောက်ထားသည်။
သြဂုတ်လ ၂၄ရက် နေ့ခင်းပိုင်းမှစ၍ ကျွန်းလှ အနောက်ခြမ်း ဝေလမူရွာ ကို Mi35 တစ်စင်း Mi 17ထောက်ပို့ ၂စင်းဖြင့် ၄ခေါက်တိတိ အကြမ်းဖက်စစ်သားများ ချသွားပြီး ရွာအတွင်း အကြမ်းဖက်ဖြိုခွင်းနေကြောင်း Infinity Group က ဖော်ပြသည်။
“ဝေလမူရွာသည် လေကြောင်းဖြင့် ပစ်ခတ်တိုက်ခိုက်ခံရသည်မှာ ယခုအကြိမ်ရောဆို နှစ်ကြိမ်ရှိပြီဖြစ်သည်။ အထိခိုက်စာရင်းများမှာ ဆက်သွယ်ရေးလိုင်းများ အားလုံး ဖြတ်တောက်ထားခြင်းကြောင့် အတိအကျ မသိရသေးပါ။”ဟု Infinity Group ကအသိပေးသည်။
(သုံးမြို့နယ် နယ်စပ်တိုက်ပွဲတွင် အကြမ်းဖက်စစ်တပ်ထံမှ သိမ်းဆည်းရမိသော လက်နက်ခဲယမ်းများ။ ဓါတ်ပုံ-CJ)
