မွန်ပြည်နယ် သံဖြူဇရပ်မြို့နယ် အံခဲ-ဝဲဂလောင်းကျေးရွာ ပင်လယ်ပြင်ကမ်းခြေအနီးရှိ ကျိုက်နဲရေလယ်ဘုရားဖူးသူများ ရေထဲဖြတ်ကူးချိန် ပင်လယ်ရေ ရုတ်တရက်မြင့်တက်လာမှုကြောင့် ဘုရားဖူး၁၅ဦး ရေထဲ မျောပါသေဆုံးပြီး ၃၀ဦး ပျောက်ဆုံးနေသည့်ကိစ္စရပ်အတွက် အထူးပင်စိတ်မကောင်းဖြစ်ရပြီး မိသားစုများနည်းတူ ထပ်တူဝမ်းနည်းကြေကွဲရကြောင်း အမျိုးသားညီညွတ်ရေးအစိုးရ(NUG)က ထုတ်ပြန်သည်။
ထို့အပြင် ဒေသခံမိဘပြည်သူများအနေဖြင့် ကျန်ရစ်သူမိသားစုများအား ကိုယ်အားစိတ်အားဖြင့် ဝိုင်းဝန်းစောင့်ရှောက်ပေးကြပါရန် NUGက မေတ္တာရပ်ခံသည်။
ယနေ့(နိုဝင်ဘာ ၂၁ ရက်)မွန်းလွဲ (၃) နာရီအထိ ရေပြန်တက်လာနေ၍ ရှာဖွေကယ်ဆယ်ရေးလုပ်ငန်းများ ရပ်နားထားရသည်ဟု သိရသည့်အတွက် များစွာပူပန်မိသည်ဟု NUG က ဆိုသည်။
ရှာဖွေကယ်ဆယ်ရေး လုပ်ဆောင်နေသော ဌာနေအရပ်ဖက်လူမှုကူညီရေးအဖွဲ့အစည်းများနှင့် ပြည်သူလူထုများမှ စနစ်တကျ ပူးပေါင်းပါဝင်ကြရန် တိုက်တွန်းသည်။
Public Service Announcement
ကယ်ဆယ်ရေးလုပ်ငန်းများကို ဆောင်ရွက်နေသူများကို အမျိုးသားညီညွတ်ရေးအစိုးရအနေဖြင့် ချီးကျူးဂုဏ်ပြုကာ ဘေးရန်ကင်းစွာ ကယ်ဆယ်ရေးလုပ်ငန်းများကို ဆက်လက်ဆောင်ရွက်နိုင်ပါစေဟုလည်း NUG က ဆုတောင်းသည်။
