အမေရိကန်လက်ထောက်နိုင်ငံခြားရေးဝန်ကြီးရဲ့ အရှေ့ တောင်အာရှခရီးစဉ်အတွင်း မြန်မာစစ်ကောင်စီရဲ့ အကြမ်းဖက်မှုတွေရပ်တန့်ရေး ဖိအားပေးဖို့ နည်းလမ်းတွေ ဆွေးနွေးမယ်လို့ အမေရိကန်နိုင်ငံခြားရေးဝန်ကြီး ဌာနက ထုတ်ပြန်ပါတယ်။
အရှေ့အာရှနှင့် ပစိဖိတ်ရေးရာ နိုင်ငံခြားရေးလက်ထောက်ဝန်ကြီး Daniel J. Kritenbrink ဟာ နိုဝင်ဘာ ၂၇ ကနေ ဒီဇင်ဘာ ၄ရက်အထိ ဂျာကာတာ၊ ကွာလာလမ်ပူ၊ စင်ကာပူနဲ့ ဘန်ကောက်တို့ကိုလာရောက်မှာဖြစ်ပြီး ခရီးစဉ်နဲ့ပတ်သက်လို့ သတင်းထုတ်ပြန်ရာမှာ မြန်မာ့အရေးထည့်သွင်း ဆွေးနွေးမှာဖြစ်တယ်လို့ ဖော်ပြပါတယ်။
မြန်မာနိုင်ငံဒီမိုကရေစီလမ်းကြောင်းပေါ် ပြန်လည်ရောက်ရှိရေးနဲ့ လူသားချင်းစာနာမှုအကူအညီတွေ နှောင့်နှေးကြန့်ကြာခြင်းမရှိဘဲ ခွင့်ပြုပေးရေး နည်းလမ်းတွေကိုလည်း လက်ထောက်နိုင်ငံခြားရေးဝန်ကြီးရဲ့ အာဆီယံ ၄ နိုင်ငံခရီးစဉ်အတွင်း ဆွေးနွေးသွားမယ်လို့ ထုတ်ပြန်ပါတယ်။
အမေရိကန်နိုင်ငံခြားရေးဝန်ကြီးဌာန အရှေ့အာရှနှင့် ပစိဖိတ်ရေးရာလက်ထောက်ဝန်ကြီး Daniel J. Kritenbrinkဟာ ပြီးခဲ့တဲ့နှစ်က ဗီယက်နမ်ဆိုင်ရာ သံအမတ်ကြီးအဖြစ်တာဝန်ထမ်း ဆောင်ခဲ့သူဖြစ်ပါတယ်။