CDM ဗိုလ်မှူး Major 48၏ ဦးဆောင်မှုနှင့်အတူ စစ်ဗျူဟာ၊တိုက်ခိုက်ရေးနှင့် ဖောက်ခွဲရေးကျွမ်းကျင်ပညာရှင်များဖြင့် People Soldiers’ Defense Force (PSDF)ကို ဖွဲ့စည်းထားကြောင်း အဆိုပါအဖွဲ့က ကြေညာသည်။
အာဏာရှင်စစ်ကောင်စီလက်အောက်မှ နှုတ်ထွက်လာသည့် CDM ဗိုလ်ကြီးများအနက် စစ်ဗျူဟာဆိုင်ရာ အကြံပေးနှင့် ဆက်ဆံရေးအရာရှိအဖြစ် ဗိုလ်ကြီးထက်မြတ်၊တိုက်ခိုက်ရေးနှင့် စစ်ဗျူဟာဆိုင်ရာ အကြံပေး အဖြစ် ဗိုလ်ကြီးအေးချမ်းက တာဝန်ယူမည်ဖြစ်သည်။
အလားတူ တိုက်ခိုက်ရေးနှင့် စစ်ဗျူဟာ ဆိုင်ရာတွဲဖက်အကြံပေးအဖြစ် ဗိုလ်ကြီးဇင်ယော်နှင့် ဖောက်ခွဲဖျက်ဆီးရေးနှင့် စစ်ဗျူဟာဆိုင်ရာအကြံပေးအဖြစ် ဗိုလ်ဇာနည်အောင်က ဆောင်ရွက်မည်ဖြစ်သည်။
ထို့အပြင် နယ်ပယ်ဒေသ အသီးသီးရှိ မြေပြင်အာဏာဖီဆန်ရေး လှုပ်ရှားမှုများတွင် ဦးဆောင်ပါဝင်ဆောင်ရွက်နေသော လုံခြုံရေးအရ အမည်ဖော်ပြ၍ မရသေးသည့် အရာရှိ၊စစ်သည်များနှင့် အခြားသောကျွမ်းကျင် ပညာရှင်များလည်းပါဝင်ဖွဲ့စည်းထားကြောင်းလည်း အသိပေးထားသည်။
Public Service Announcement
နိုဝင်ဘာအတွင်းက စတင်ဖွဲ့စည်းခဲ့သော PSDF သည် ပြည်သူ့ကာကွယ်ရေးတပ်ဖွဲ့များဖြစ်သော ချောင်းဦး၊မြောင်၊မြင်းမူ၊ဆားလင်းကြီး၊ဒီပဲယင်း၊မြင်းခြံ အပါအဝင် မြေအောက် UG အဖွဲ့အချို့နှင့် မဟာမိတ်အဖွဲ့အဖြစ် ပူးပေါင်းထားသည်။
