ကိုဗစ်စည်းကမ်းချိုးဖောက်တယ်ဆိုပြီး ဒေါ်အောင်ဆန်းစုကြည်ကို စွဲဆိုထားတဲ့အမှုမှာ ဒေါက်တာဇော်မြင့်မောင် သက်သေအဖြစ် တရားရုံးမှာ လာရောက်ထွက်ဆိုဖို့ ထောင်အာဏာပိုင်တွေက ခရီးသွားခွင့် မပြုဘူးလို့ သိရပါတယ်။
သက်သေအဖြစ် လာရောက်ထွက်ဆိုဖို့ တရားရုံးက ဆင့်ခေါ်စာ ပို့ခဲ့ပေမယ့် ထောင်အာဏာပိုင်တွေက ဒေါက်တာဇော်မြင့်မောင်ကို နေပြည်တော်က တရားခွင်ကို ခရီးသွားခွင့်မပြုခဲ့တာပါ။
ဒါကြောင့် တရားသူကြီးက ဒေါက်တာဇော်မြင့်မောင်သက်သေထွက်ဆိုနိုင်ဖို့ ဗီဒီယိုကွန်ဖရန့်ဆင်းကတဆင့် လုပ်ဆောင်မလားလို့ ဒေါ်အောင်ဆန်းစုကြည်တို့ဘက်ကို မေးမြန်းခဲ့တယ်လို့ တရားရုံးနဲ့နီးစပ်သူတွေထံက သိရပါတယ်။
ဒီအမှုဟာ ပြီးခဲ့တဲ့ ၂၀၂၀ ဩဂုတ်လအတွင်းက နေပြည်တော်က NLD ထောက်ခံသူတွေနေထိုင်ရာ နေရာကို သွားရောက်တဲ့ ခရီးစဥ်နဲ့ ပတ်သတ်ပြီး ဒေါ်အောင်ဆန်းစုကြည်ကို ထောင် ၃နှစ်အထိ ချလို့ရတဲ့ သဘာဝဘေးဥပဒေ ပုဒ်မ ၂၅ နဲ့ တရားစွဲတဲ့အမှုဖြစ်ပါတယ်။
Public Service Announcement
အဲဒီခရီးစဥ်မှာ ဒေါက်တာဇော်မြင့်မောင်လည်း လိုက်ပါတာဖြစ်တဲ့အတွက် သက်သေအဖြစ် ထွက်ဆိုနိုင်ဖို့ ဒေါ်အောင်ဆန်းစုကြည်ရဲ့ ရှေ့နေအဖွဲ့က တရားရုံးကိုတင်ပြထားတာဖြစ်ပါတယ်။
လက်ရှိအချိန်မှာ ဒေါက်တာဇော်မြင့်မောင်ဟာ ထောင်ဒဏ် ၄နှစ် ချခံထားရပြီး အခြားသောအမှုတွေနဲ့လည်း မန္တလေး အိုးဘိုထောင်ထဲက ရင်ဆိုင်နေရပါတယ်။
