မြန်မာနိုင်ငံတွင် ခြောက်လအတွင်း Tik Tok အကောင့်ပေါင်း ၉၂,၀၀၀ကျော်နှင့် ဗီဒီယိုပေါင်း ၈၈၀,၀၀၀ခန့်ကိုဖယ်ရှားခဲ့ကြောင်း Tik Tok (မြန်မာ) ကဒီဇင်ဘာ ၉ ရက်စွဲဖြင့် ထုတ်ပြန်သည်။
၂၀၂၁ ပထမနှစ်ဝက်ဖြစ်သည့် ဇန်နဝါရီ ၁ ရက်မှ ဇွန် ၃၀ ရက်အထိ ခြောက်လအတွင်းအဆိုပါအကောင့်များနှင့် ဗီဒီယိုဖိုင်များကိုTik Tok၏ လူမူအသိုင်းအဝိုင်းလမ်းညွှန်ချက် သို့မဟုတ် ဝန်ဆောင်မူဆိုင်ရာ မူဝါဒများကို ချိုးဖောက်ခဲ့ခြင်းကြောင်းဖယ်ရှားခဲ့ခြင်းဖြစ်ကြောင်းဖော်ပြထားသည်။
ဖယ်ရှားလိုက်သည့် ဗီဒီယိုများသည် အကြမ်းဖက်အစွန်းရောက်ဝါဒနှင့်ပတ်သတ်ပြီးချိုးဖောက်မူများ၊ ကြမ်းတမ်း၍ အမြင်မတော်သော အကြောင်းအရာများ၊ အမုန်းပွါးဖွယ်
အပြုအမူများ၊ သတင်းမှားများနှင့် အသက်အရွယ်မပြည့်သေးသူများကိုထိခိုက်စေမူများ ပါဝင်ခြင်းကြောင့်ဖြစ်သည်ဟုလည်း ပါရှိသည်။ ထိုသို့ဖယ်ရှားခဲ့သည့် ထဲတွင် အသက်မပြည့်သေးသူများကို ထိခိုက်စေသည့် ဗီဒီယို ၃၅ ရာခိုင်နှုန်းပါဝင်သည်ဟု Tik Tok (မြန်မာ)က ဆိုသည်။ ၁၂ ဒသမ ၉ရာခိုင်နှုန်းသည် ကြမ်းတမ်း၍ အမြင်မတော်သော အကြောင်းအရာများပါဝင်သည့် ဗီဒီယိုဖိုင်ဖြစ်ပြီး အကြမ်းဖက်အစွန်းရောက်ဝါဒနှင့် သက်ဆိုင်သည့် ဗီဒီယို ၆ ဒသမ ၆ ရာခိုင်နှုန်းပါဝင်သည်ဟုလည်းဆိုသည်။ သတင်းမှား ဗီဒီယိုဖိုင်က ၁ ဒသမ ၁ ရာခိုင်နှုန်းရှိပြီး အမုန်းပွားဖွယ် ဗီဒီယိုများက ၀ ဒသမ ၄၄ ရာခိုင်နှုန်းကျော်ပါဝင်သည်ဟု ဖော်ပြထားသည်။
ဖယ်ရှားခဲ့သည့် ဗီဒီယိုဖိုင်များတွင် ၉၀ ဒသမ ၃ ရာခိုင်နှုန်းကျော်ကို မည်သူမျှ မကြည့်ခင်ဖယ်ရှားခဲ့ပြီး ၉၃ ဒသမ ၉ရာခိုင်နှုန်းကျော်ကို ၂၄ နာရီအတွင်းဖယ်ရှားခဲ့သည်ဟုလည်းပါရှိသည်။ ဖယ်ရှားခဲ့သည့် ဗီဒီယို ၉၇ ဒသမ ၉ ရာခိုင်နှုန်းသည့် Tik Tok က ကြိုတင်ဖော်ထုတ် ဖယ်ရှားခဲ့ခြင်းဖြစ်သည်ဟုလည်းဆိုထားသည်။
Public Service Announcement
သို့သော် လှိုင်သာယာမြို့နယ်တွင် ဆန္ဒပြ ပြည်သူများကို အကြမ်းဖက်စစ်ကောင်စီတပ်က အစုလိုက်အပြုံလိုက် ပစ်သတ်ခဲ့စဥ်က ကျူးလွန်ခဲ့သော စစ်ကောင်စီ၏ ရဲနှင့်စစ်သားများက ပြည်သူများကို ပစ်သတ်ခဲ့မှုအပေါ် လှောင်ပြောင်ထားသော၊ အောင်ပွဲခံထားသော Tik Tok ဗီဒီယိုဖိုင်များကို ချက်ချင်းဖယ်ရှားခဲ့ခြင်းမပြုခဲ့ပေ။ ထိုကြောင့်ပြည်သူများကအဆိုပါဗီဒီယိုဖိုင်များမြင်တွေ့ခဲ့ရသလို ၊နိုင်ငံတကာသတင်းဌာနများကလည်း ကိုးကားဖော်ပြခဲ့သည်ကိုတွေ့ရသည်။
