ဘန်ကောက် မြောက်ပိုင်း ပါသွမ်သာနီမှာ နေထိုင်တဲ့ မြန်မာ အမျိုးသမီး တစ်ဦးကို မြန်မာ စုံတွဲ တစ်တွဲက ပြန်ပေးဆွဲ ဖမ်းဆီးလိုက်ပြီး သူ့ကို သံကြိုးခတ်ထားတဲ့ ဗီဒီယိုကို လူမှုကွန်ရက် ပလက်ဖောင်း Tik Tokပေါ် တင်ခဲ့တာ ဖြစ်ပါတယ်။ အမျိုးသမီးရဲ့ လက်ကို ကြိုးချည်ပြီး ခြေကျင်းဝတ်မှာ သံကြိုးခတ်ထားတဲ့ ဗီဒီယိုကို Tik Tokပေါ်မှာ ထိုင်းနိုင်ငံသား တစ်ဦးက တွေ့ရှိတဲ့နောက် အမြန်ဆုံး ပြန်လွှတ်ပေးဖို့ တိုက်တွန်းခဲ့ပါတယ်။
နောက်ပိုင်းကျတော့ ဖမ်းထားတဲ့ နှစ်ယောက်က အမျိုးသမီးကို ပြန်လွှတ်ပေးပြီး ဘန်ကောက်မြို့ထဲကို ထွက်ပြေး တိမ်းရှောင်သွားခဲ့ပါတယ်။ ပြန်ပေးဆွဲ ခံခဲ့ရတဲ့ အမျိုးသမီးက ဒီဖြစ်စဉ်ကို ရဲတွေဆီ တိုင်ကြားခဲ့တဲ့နောက် ကျူးလွန်တဲ့ မြန်မာ အမျိုးသားနဲ့ အမျိုးသမီးကို ဖော်ထုတ် ဖမ်းဆီးလိုက်တာပါ။
အခုကိစ္စမှာ ပါဝင်ပတ်သက် နေသူတွေရဲ့ နာမည် အမှန်တွေကိုတော့ ရဲတွေက မထုတ်ပြန်သေးပါဘူး။ ဒါပေမဲ့ ပြန်ပေးဆွဲ ခံရတဲ့ အမျိုးသမီးဟာ မြန်မာနိုင်ငံက Tik Tok သုံးစွဲသူတွေကြားမှာ လူသိများတဲ့ Social Influencer တစ်ယောက်လို့တော့ သတင်းတွေက ဖော်ပြထားပါတယ်။
