ထိုင်းကိုလာတဲ့သူတွေ ကွာရင်တင်းဝင်စရာမလိုတဲ့အစီအစဉ် ဒီနေ့ကစတင်ရပ်ဆိုင်း

ထိုင်းနိုင်ငံကို လာရောက်သူတွေ ကွာရင်တင်းဝင်စရာမလိုတဲ့ Test & Go အစီအစဉ်ကို ဒီနေ့ကစတင်ပြီး ရပ်ဆိုင်းလိုက်တယ်လို့ ထိုင်းဝန်ကြီးချုပ်ပရာယွတ်က ကြေညာလိုက်ပါတယ်။

အိုမီခရွန်ဗိုင်းရပ်စ်ကူးစက်မှုမြင့်တက်လာတာနဲ့ ထိုင်းပြည်သူတွေ ဘေးကင်းဖို့ ကွာရင်းတင်းဝင်စရာမလိုတဲ့အစီအစဉ်ကို ရပ်ဆိုင်းဖို့ဆုံးဖြတ်လိုက်တဲ့အကြောင်း ဒီနေ့ အစိုးရအိမ်တော်မှာ ပြုလုပ်တဲ့ အစည်းအဝေးအပြီး ပရာယွတ်က အသိပေးလိုက်တာပါ။

ဆုံးဖြတ်ချက် ချပြီး ၂ပတ်အကြာ ဇန်နဝါရီလ ၄ ရက် နေ့မှာ အခြေအနေတွေကိုပြန်သုံးသပ်မှာဖြစ်ပြီး အဲဒီကာလမတိုင်ခင်တော့ ထိုင်းနိုင်ငံကိုလာရောက်ခွင့်လျှောက်ထားတာကို ခွင့်ပြုတော့မှာမဟုတ်ဘူးလို့ ပရာယွတ်က ဆိုပါတယ်။

Test & Go နဲ့ Sandbox အစီအစဉ်ဟာ ထိုင်းနိုင်ငံကို လေကြောင်းလိုင်းနဲ့ ရောက်လာသူတွေကို ကိုဗစ်စစ်ပြီး ပိုးမတွေ့ရင် ကွာရင်းတင်းဝင်စရာမလိုတဲ့အစီအစဉ်တွေဖြစ်ပါတယ်။

Public Service Announcement

အဲဒီအစီအစဉ် နဲ့ ထိုင်းကိုလာရောက်ဖို့ ရောက်ထားသူဟာ နှစ်သိန်းလောက် ရှိပြီး တစ်သိန်းတစ်သောင်းလောက်ကတော့ ထိုင်းကိုရောက်ရှိပြီးပြီလို့ ဝန်ကြီးချုပ်ပရာယွတ်က ပြောပါတယ်။

ကျန်နေသေးတဲ့သူတွေကို ထိုင်းနိုင်ငံကိုလာရောက်ခွင့်ပြုမှာဖြစ်ပါတယ်။

Test & Go နဲ့ Sandbox အစီအစဉ်တွေကို ရပ်ဆိုင်းလိုက်တာကြောင့် ထိုင်းကိုလာရောက်တဲ့သူတွေဟာ ကွာရင်းတင်းဝင်ဖို့လိုလာပါတယ်။

ကွာရင်းတင်းကာလကတော့ လာရောက်တဲ့ နိုင်ငံရဲ့အခြေအနေ ၊ ကာကွယ်ဆေးအမျိုးအစားပေါ်မူတည်ကာ ၇ ရက်ကနေ ၁၀ ရက်အထိ ကြာမြင့်မယ်လို့သိရပါတယ်။

ဓာတ်ပုံ − ဘန်ကောက်ပို့စ်