အိန္ဒိယနိုင်ငံခြားရေးဝန်ကြီးဌာန အတွင်းဝန်Harsh Vardhan Shringla သည် မြန်မာနိုင်ငံသို့ နှစ်ရက်ကြာခရီးစဉ် ယနေ့(ဒီဇင်ဘာ ၂၂ ရက်)လာရောက်မည်ဖြစ်ပြီး အာဏာသိမ်းစစ်ကောင်စီခေါင်းဆောင် မင်းအောင်လှိုင်နှင့် တွေ့ဆုံမည်ဖြစ်သည်။
အတွင်းဝန်၏နှစ်ရက်ကြာခရီးစဉ်အတွင်း စစ်ကောင်စီ၊ နိုင်ငံရေးပါတီများနှင့် အရပ်ဘက် အဖွဲ့အစည်းများနှင့် တွေ့ဆုံဆွေးနွေးမည်ဖြစ်ကြောင်း အိန္ဒိယနိုင်ငံခြားရေးဝန်ကြီး ဌာနက ထုတ်ပြန်သည်။
အဆိုပါခရီးစဉ်သည် ဒီမိုကရေစီနည်းကျရွေးကောက်ခံအရပ်သားအစိုးရကိုဖြုတ်ချခဲ့ပြီး စစ်တပ်က အာဏာသိမ်း ခဲ့သည့် ဖေဖော်ဝါရီ ၁ ရက်နောက်ပိုင်း အိန္ဒိယမှ အဆင့်မြင့်အရာရှိတစ်ဦး ပထမဆုံးလာရောက်ခြင်းဖြစ်သည်။
“မြန်မာနိုင်ငံကို လူသားချင်းစာနာမှုအကူအညီပေးရေးနဲ့ဆက်စပ်တဲ့ကိစ္စရပ်တွေ၊ လုံခြုံရေးနဲ့ အိန္ဒိယ-မြန်မာနယ်စပ်အရေးတွေနဲ့ မြန်မာ့နိုင်ငံရေးအခြေအနေတွေကို ဆွေးနွေးကြမှာပါ”ဟု အိန္ဒိယနိုင်ငံခြားရေး ဝန်ကြီးဌာနက ဆိုသည်။
အိန္ဒိယသည် ကမ္ဘာ့အကြီးဆုံး ဒီမိုကရေစီနိုင်ငံကြီးဖြစ်သော်လည်း အခြားနိုင်ငံများ၏ ဒီမိုကရေစီရေးကို ပံ့ပိုးထောက်ကူမှုမပြုခြင်းက ၎င်း၏နိုင်ငံခြားရေးမူဝါဒဖြစ်ကြောင်း နိုင်ငံရေးလေ့လာသူ တစ်ဦးက မှတ်ချက်ပြုသည်။
Public Service Announcement
“ဒါပေမဲ့ခုအဆင့်မြင့်အရာရှိတစ်ယောက်လာတာကတော့ အတော့်ကိုထူးခြားတယ်ဆိုရမယ်။ မြန် မာနဲ့ကနယ်စပ်ချင်းကလည်းထိစပ်နေတာကြောင့်လည်းအဓိကဖြစ်မယ်။ ပြီးတော့အရင်မြန်မာရဲ့ စစ်အာဏာသိမ်းပွဲကခပ်မြန်မြန်ပဲပြီးသွားပြီးစစ်တပ်ကထိန်းချုပ်သွားတာကိုး။ ခုမအလရဲ့အာဏာသိမ်းပွဲက အဲလိုမဟုတ်ဘူး။ ပြည်သူလူထုကလက်နက်ကိုင်လမ်းစဉ်ကိုပါ လိုလားထောက်ပံ့ပြီး အာဏသိမ်းစစ်တပ်ကို ဆန့်ကျင်တွန်းလှန်နေတော့ မြန်မာ့နွေဦးတော်လှန်ရေးအရှိန်ကအားကောင်းလာနေတယ်။ ဒီအရှိန်ရဲ့ဂယက်က ဒေသတွင်းကိုအပြင်အိမ်နီးချင်းအိန္ဒိယကိုပါ သက်ရောက်မှုတွေကရှိကိုရှိလာနိုင်တယ်” ဟု ၎င်းက ဆိုသည်။
အတွင်းဝန်၏ ခရီးစဉ်တွင် မြန်မာနိုင်ငံကို ဒီမိုကရေစီ လမ်းကြောင်းပြန်တည့်ရေးနှင့် လူသားချင်းစာနာထောက်ထားမှုလုပ်ငန်းကိစ္စကို ရှေ့တန်းတင်ထားသော်လည်း အိန္ဒိယ-မြန်မာ နယ်စပ်အရေးက အဓိကဖြစ်နိုင်ကြောင်း ယင်းနိုင်ငံရေးလေ့လာသူက သုံးသပ်သည်။
ထို့အပြင် အိန္ဒိယသည် စစ်ကောင်စီနှင့် dealing(အပေးအယူ)လုပ်ရန်မဟုတ်ဘဲ လက်ရှိ ပြဿ နာများကို ပြေလည်အောင်ဖြေရှင်းရန် ဖိအားပေးရန် လာရောက်ခြင်းဆိုပါက စစ်ကောင်စီကို တရားဝင်မှုပေးမည့်ခရီးစဉ်ဟု ပြောမရကြောင်း ၎င်းက ဆက်ပြောသည်။
“ဘယ်လိုဆက်ဆံထိတွေ့တာလဲဆိုတဲ့အချက်ကအရေးကြီးမယ်ထင်ပါတယ်။ နောက်တစ်ခုကစကစအနေနဲ့ အိန္ဒိယလာတာကိုအသုံးချပြီး တက်ဖို့လောက်ထိ ကမ္ဘာကြီးကလည်းခွင့်မပြုလောက်ဘူး။ ဒီဘက်ခေတ်မှာ ဒါမျိုးဝါဒဖြန့်တာမျိုးကမရတော့ပါဘူး”ဟု ၎င်းက ဆိုသည်။
