လှည့်စားခေါ်ဆောင် ခံရပြီး ယူကရိန်း စစ်မြေပြင်မှာ ပါဝင်တိုက်ခိုက်နေရတယ်ဆိုတဲ့ နီပေါနိုင်ငံသားတွေ အရေးအတွက် နီပေါ အစိုးရက ရုရှားဆီကို ဆက်သွယ်ပြီး အကူအညီ တောင်းခံထားကြောင်း သိရပါတယ်။
နီပေါ ဒုတိယ ဝန်ကြီးချုပ် ခါဂျီ ရှရက်ရှ်သာ ရုရှား စစ်တပ်ထဲမှာ ပါဝင် အမှုထမ်းနေရပြီး ယူကရိန်း စစ်မြေပြင်ကို ရောက်နေတဲ့ နီပေါနိုင်ငံသားတွေ စာရင်းကို တိတိကျကျ ပေးပို့ဖို့ ရုရှား အစိုးရဆီ တောင်းဆိုထားကြောင်း အခုသီတင်းပတ် အစောပိုင်းမှာ ပြောကြားခဲ့ပါတယ်။ ဒါပေမဲ့လည်း အဲဒီ နိုင်ငံသားတွေကို ဇာတိနိုင်ငံ ပြန်ခေါ်ဖို့ ဆိုတာက လောလောဆယ်မှာ အခြေအနေတွေ ရှုပ်ထွေးလွန်းနေဆဲလို့ သူက ဝန်ခံခဲ့ပါတယ်။
ရာနဲ့ချီ များပြားတဲ့ နီပေါနဲ့ အိန္ဒိယ နိုင်ငံသားတွေဟာ ရုရှား-ယူကရိန်း စစ်ပွဲမှာ နှစ်ဖက်စလုံးက ပါဝင်တိုက်ခိုက်ပေးနေရတယ်လို့ ဆိုပါတယ်။ အများစုဟာ အကြောင်းအမျိုးမျိုးနဲ့ လှည့်စား ခေါ်ယူခံရပြီး စစ်မြေပြင်ကို ပို့ဆောင် ခံခဲ့ရတာပါ။
သူတို့ရဲ့ မိသားစုဝင်တွေ၊ ဒါမှမဟုတ် ဆွေမျိုးသားချင်းတွေက ယူကရိန်း စစ်မြေပြင်မှာ ပိတ်မိနေတာကြောင့် ကူညီ ခေါ်ထုတ်ပေးဖို့ နီပေါ အစိုးရဆီ ဆက်သွယ် အကူအညီ တောင်းခံထားမှု ၇၀၀ ဝန်းကျင်ထိ ရှိတယ်လို့ ဆိုပါတယ်။
Public Service Announcement
နီပေါရဲ့ နိုင်ငံခြားရေး ဝန်ကြီးလည်းဖြစ်တဲ့ ရှရက်ရှ်သာက သူဟာ အဲဒီကိစ္စကို အသိမ်မွေ့ဆုံး ကိုင်တွယ် ဖြေရှင်းနိုင်ဖို့ ကြိုးစားနေပြီး ရုရှား သံအမတ်ကြီး အလက်ဆီ နိုဗီကော့ဗ်နဲ့လည်း ဆက်သွယ် ဆွေးနွေးနေတယ်လို့ ပြောပါတယ်။
ဒါပေမဲ့ စစ်ပွဲ ဆက်လက် ဖြစ်ပွားနေသ၍ စစ်မြေပြင်ရောက် နီပေါ နိုင်ငံသားတွေကို ပြန်ခေါ်ဖို့က အခက်အခဲတွေ ရှိနေဦးမယ်လို့ သူက မှတ်ချက် ပေးခဲ့ပါတယ်။ သတင်းတွေရဲ့ အဆိုအရ နီပေါ နိုင်ငံသားတွေဟာ ရုရှားဖက်မှာသာ မကဘဲ ယူကရိန်းဖက်ကပါ ပါဝင်တိုက်ခိုက်ဖို့ ဖိအားပေး ခံရတာတွေ ရှိနေတယ်လို့ သိရပါတယ်။
အိန္ဒိယဖက်မှာလည်း အလားတူ အခြေအနေနဲ့ ပတ်သက်လို့ နောက်ကွယ်က ညှိနှိုင်းမှုတွေ ရှိနေပါတယ်။ ဒေသခံ မီဒီယာတွေရဲ့ ဖော်ပြချက်အရ နီပေါနိုင်ငံသား အနည်းဆုံး ၄၀၀ ကျော်ဟာ လုပ်ခလစာအဖြစ် နီပေါရူပီးငွေ ၃ သိန်းလောက် ရရှိမယ့် အမျိုးသား အကူဝန်ထမ်း အလုပ်အတွက် လူပွဲစားတွေနဲ့ ချိတ်ဆက်ပြီး ရုရှားဆီ ခေါ်ယူခံခဲ့ရတယ်လို့ ဆိုပါတယ်။ ဒါပေမဲ့ သူတို့တွေဟာ ရှေ့တန်းကို ပို့ဆောင်ခံခဲ့ရပါတယ်။
ပြီးခဲ့တဲ့ နှစ်ကုန်ပိုင်းကလည်း နီပေါ ရဲတပ်ဖွဲ့ဟာ ခတ္တမန္ဒူ မြို့တော်မှာ လူမှောင်ခို ဂိုဏ်းတွေကို ဖြိုခွင်းပြီး လူ ၁၈ ဦးထက် မနည်းကို လူမှောင်ခိုမှု၊ လိမ်လည်မှုတွေနဲ့ တရားစွဲဆိုခဲ့ပါတယ်။
နီပေါ နိုင်ငံခြားရေး ဝန်ကြီးဌာနက ကောက်ယူရရှိထားတဲ့ စာရင်းတွေအရ တိုက်ပွဲတွေမှာ အသက်စွန့်လိုက်ရတဲ့ နီပေါ နိုင်ငံသား ၁၂ ဦးထက်မနည်း ရှိခဲ့ပြီး ဖြစ်သလို ၁၀၀ ဝန်းကျင်ဟာ ပျောက်ဆုံး၊ ဒဏ်ရာရ အခြေအနေတွေ ကြုံနေတယ်လို့ သိရပါတယ်။ စစ်မြေပြင်ရောက် အိန္ဒိယ နိုင်ငံသားတွေထဲမှာလည်း အနည်းဆုံး ၂ ဦးရဲ့ သေဆုံးမှုကို အတည်ပြုထားနိုင်ပြီး ဖြစ်ပါတယ်။
ကိုးကား: Guardian
