ကယားပြည်နယ် ဒီးမော့ဆို မြို့မရဲစခန်းရှိ အကြမ်းဖက်စစ်ကောင်စီတပ်ဖွဲ့ကို ဝင်ရောက်တိုက်ခိုက်ရာ စစ်ကောင်စီတပ်သား သုံးဦး သေဆုံးကြောင်း ပြည်သူ့ကာကွယ်ရေးတပ်-ဒီးမော့ဆို(DMO-PDF)က ယနေ့ ထုတ်ပြန်သည်။
ဒီဇင်ဘာ ၂၅ရက် ညနေ ၄ နာရီခန့်က စတင်ခဲ့သော တိုက်ပွဲသည် ညနေ ၆ နာရီဝန်းကျင်အထိ နှစ်နာရီ ကြာမြင့်ကာ (DMO-PDF)တပ်ဖွဲ့ နှင့် KGZ တပ်ဖွဲ့ များပူးပေါင်းတိုက်ခိုက်ခဲ့ခြင်း ဖြစ်သည်။
တိုက်ပွဲအတွင်း အကြမ်းဖက်စစ်ကောင်စီတပ်ဖက်မှ သုံးဦး သေဆုံးပြီး ထိခိုက်ဒဏ်ရာရရှိမှုများလည်းရှိခဲ့ကာ ပြည်သူ့ကာကွယ်ရေးတပ်-ဒီးမော့ဆို(DMO-PDF)ဖက်မှ တပ်ဖွဲ့ဝင်နှစ်ဦးလည်း ထိခိုက်ဒဏ်ရာရရှိခဲ့သည်။
“ရဲဘော် နှစ်ဦးရဲ့ ထိခိုက်ဒဏ်ရာကတော့ စိုးရိမ်စရာမရှိတော့ပါဘူး။လောလောဆယ် တိုက်ပွဲ အခြေအနေကတော့ အကြမ်းဖက်စစ်ကောင်စီရဲ့အခြေအနေကို စောင့်ကြည့်နေဆဲပဲ”ဟု DMO-PDFမှ တာဝန်ရှိသူက ပြောသည်။
Public Service Announcement
တိုက်ပွဲအတွင်း အကြမ်းဖက်စစ်ကောင်စီတပ်ဖွဲ့က ဒီးမော့ဆိုမြို့မရဲစခန်းရှေ့ရှိ ပြည်သူပိုင်နေအိမ်တစ်လုံး မီးရှို့ခဲ့ပြီးတိုက်ပွဲဖြစ်ပွားမှုမရှိသည့် ဒေါငံခါးကျေးရွာဘက်ကို လက်နက်ကြီးပစ်ခတ်ရာ ငြိမ်းချမ်းခြင်းသခင်မ ဘုရားရှိခိုးကျောင်းအနောက်ဘက် ပေ ၂၀၀ခန့်အကွာမှာ ကျရောက်ပေါက်ကွဲခဲ့သည်ဟု DMO-PDF က ဆိုသည်။
ယမန်နေ့ည ၇ နာရီ ၄၅ မိနစ်ခန့်ကလည်း အကြမ်းဖက်စစ်ကောင်စီ နှင့် ပြည်သူ့ကာကွယ်ရေးပူးပေါင်းတပ်တို့ ဒီးမော့ဆို မြို့နယ်တွင် ၁၅ မိနစ်ခန့်အကြာ ထိတွေ့တိုက်ပွဲ ထပ်မံဖြစ်ပွားခဲ့ကြောင်းလည်း သိရသည်။
ထို့ကြောင့် အကြမ်းဖက်စစ်ကောင်စီတပ်မှ အင်အားသုံးထိုးစစ်ဆင်လာနိုင်သည့်အတွက် တိုက်ပွဲများ ထပ်မံဖြစ်ပွား နိုင်သောကြောင့် မိဘပြည်သူများအနေဖြင့် လုံခြုံရေးသတိရှိရှိသွားလာနေထိုင်ကြရန် DMO-PDF က သတိပေး သည်။
